Ankara ABD, Frenkistan, Almaniya ve Büyük Britaniyanıñ Ukrayınanen bağlı muzakerelerini teşkil etmege niyetlene. Bu aqta Milliyet neşiri haber ete. Onıñ malümatına köre, plan ABDge müim ve şahsiy kanallardan berildi.
Milliyet bildirgenine köre, Washingtonnıñ ilk izaatları müsbet, amma teklif etilgen dialog içün Rusiye vekili tapılırmı belli degil. Türkiye açıq kanallarda Ukrayınağa qoltutıp, cenk taktik nükleer silâ qullanılmayıp bitirilmeli, dep yaza neşir.
Rusiye Tış işler nazirligi vastalı hızmetlerden vazgeçmey, dep bildirdi. Müessise haber etkenine köre, olarnı bir çoq memleket teklif ete.
Rusiye-Ukrayına muzakereleri mayısta toqtatıldı. Eyyetlerniñ soñki körüşüvi İstanbulda mart ayınıñ soñunda oldı.
Ukrayına prezidenti Volodımır Zelenskıy oktâbrniñ başında sahte referendumlardan soñ Vladimir Putin Rusiye prezidenti olmağa devam etse, Moskva ile muzakereler olmaycaq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
