Türkiye Cumhuriyeti, Rusiyeniñ Qırım ilhaqını tanımayıp, bu yönelişte tış siyasetini devam ettirecek.
Bu aqta noyabrniñ 12-nde Kyivdeki Qurultay delegatlarınıñ konferentsiyasında Türkiyeniñ Ukraina elçisi Yönet Can Tezel ayttı.
«Türkiye, qırımtatarlarnıñ liderlerine qoltuta, bizler Qırımnıñ qanunsız ilhaqını tanımadıq ve bu yönelişte tış siyasetimizni saqlap qalacaqmız. Rusiye reberligine Türkiyeniñ Qırımnı Rusiye terkibinde tanımaycağını açıqça bildirmekten çekinmeymiz. Qırım ilhaqınıñ qanunlaştırılmasına yol bermemek içün elimizden kelgenini yapacaqmız», – dep qayd etti o.
Türkiye elçisi, qırımtatar liderlerine «Ukrainağa sadıq qalğanları içün» teşekkürler bildirdi.
«Türkiyeniñ, Ukrainağa sadıq olğanını isbatlağan qırımtatarlarğa qoltutqanını bildirmek içün bu konferentsiyada bulunam. Siziñ küreşiñiz zorbalıqsız, o, türlü maqtavlarğa lâyıqtır», – dedi Yönet Can Tezel.
Kyivde VI çağırılış Qırımtatar Milliy Qurultayı delegatlarınıñ konferentsiyası keçirile. Tedbirge 200 iştirakçiden ziyade keldi.
Birinci Qırımtatar Milliy Qurultayı 1917 senesi noyabr ayında saylanğan edi. 1917 senesi dekabrniñ 9-ndan 26-na qadar esas qırımtatar qanunlarını qabul etken milliy tesis toplaşuvı olaraq çalışqan edi.
1991 senesi Qırımtatar Milliy Qurultayı faaliyetini yañıdan başlattı. Ukrainada qırımtatarlarnıñ yuqarı temsil organı olaraq tanıldı. Qırım işğalinden soñ Rusiye onıñ faaliyetini yasaq etti.
