Türkiye Tış işler naziri Hakan Fidan fevralniñ 4-nde Rusiye prezidenti Vladimir Putinniñ Türkiye ziyaretini tasdıqladı. Fidan tam kününi aytmadı.
«Bu ziyaret bir çoq meseleni muzakere etmege imkân berecek», – dep ayttı nazir devlet televideniyesine bergen intervyüsında.
Yerli kütleviy haber vastaları ziyaret fevralniñ 12-nde ola bile, dep tahmin ete, lâkin prezident Recep Rayyip Erdoğannıñ ofisi bunı tasdıqlamadı.
Türkiye Rusiyeniñ Ukrayınağa qarşı büyük istilâsı başlağan soñ Putinniñ ziyaret etecek ilk NATO aza memleketi olacaq. 2022 senesi fevral ayından soñ Erdoğan ve Putin körüşken ediler, amma bu Türkiyede olmadı. Soñki sefer körüşüv bıltır sentâbr ayında Rusiyeniñ Soçi şeerinde oldı.
Başqa NATO memleketlerine köre Türkiye Rusiyege qarşı sanktsiyalar kirsetmey. Meselâ, keçken sene NATO azası olğan Türkiyege Rusiye işğal etken Ukrayına topraqlarında işlep çıqarılğan eñ az 14,3 million dollarlıq kömür ihrac etildi.
ABD ve Avropa Birligine köre Türkiye Rusiye ve Moskva kontrolindeki Ukrayına rayonlarınen ticaretini sıñırlamadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
