Ukrayına prezidenti Volodımır Zelenskıy zenaatdaşı Recep Tayyip Erdoğannı Türkiye prezidenti saylavlarında qazanğan ğalebesinen tebrikledi.
Devlet yolbaşçısı «Ukrayına eki memleketniñ strategik ortaqlığı pekişmege devam etecegine, Avropanıñ telükesizligi ve stabilligi içün işbirligi quvetleştirilecegine işana», dep qayd etti.
Mayısnıñ 28-nde Türkiyede prezident saylavlarınıñ ekinci turı olıp keçti.
Türkiye Yüksek seçim kurulunıñ malümatından faydalanğan Anadolu agentligi yazğanına köre, bülletenlerniñ 98,38%-ı esaplanğan soñ, Erdoğan reylerniñ 52,10%-ını, Kılıçdaroğlu 47,90%-ını ala. Farq dört fayızdan çoq degil. Saylayıcılarnıñ 85,6%-ı rey berdi.
«Türkiye prezidentiniñ şimdiki prezidenti, ilk neticelerge köre, Recep Tayyip Erdoğan prezident olaraq saylandı», – dep bildirdi YSK yolbaşçısı Ahmet Yener.
Erdoğan özü de ğalip çıqqanını ilân etti.
«Allahnıñ yardımınen, işançıñızğa lâyıq olacaqmız», – dep bildire prezidentniñ aytqanlarını Deutsche Welle AFP haber agentliginiñ malümatına esaslanıp.
«69 yaşında Erdoğan yigirmi yıldan berli memleketni idare ete. 2003-2014 yıllarında baş nazir edi, soñra ise parlament degil, halq saylağan ilk prezident oldı», – dep hatırlata DW.
Rey berüvniñ birinci turında namzetlerden iç birisi 50% qazanamadı, amma Türkiye prezidenti Recep Tayyip Erdoğan reylerniñ 49,51%-ını, esas raqibi Kemal Kılıçdaroğlu ise 44,88%-ını aldı. Saylayıcılarnıñ 88,92%-ı rey berdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
