Türkiye Rusiyege Moskvada «Crocus City Hall» ücüminden soñ ekinci teraktnıñ ögüni almağa yardım etti, dep yaza Hürriyet.
«Crocusta» terror ücümi 2024 senesi martnıñ 22-nde oldı. Tahqiqat komitetiniñ malümatına köre, eñ az 145 insan qurban oldı. Ücüm etkenler insanlarnıñ bir qısmını atıp öldürdi, çoqusı yanğın vaqtında boğulıp can berdi. Terakt mesülietini «İslâm devleti» gruppirovkasınıñ «Vilayat Horasan» afğan bölügi üstüne aldı.
Türkiye neşiriniñ malümatına köre, «Vilayat Horasan» vekilleri tolu alış-veriş merkezinde ekinci terror ücümini yapacaq edi, amma Türkiye istihbaratı Rusiye zenaatdaşlarını tenbiledi. Azırlanğan terakt aqqında 2024 senesi yanvar ayında İstanbulda Santa-Mariya kilsesine yapılğan silâlı ücümden soñ tutulğan gruppirovka azaları sorğu vaqtında Türkiye mahsus hızmetlerine bildirdi.
«Crocusta» terakt davası boyunca 20 insan qabaatlandı, 18-i apiste buluna. Eki kişi ketmemek şartınen yiberildi. «Mediazona» tahminlerine köre, bu «Crocus» hadimleri ola.
Tahqiqat dört tacikistanlını icracı dep saya: Muhammadsobir Fayzov, Dalercon Mirzoyev, Saidakram Raçabalizodu ve Şamsidin Fariduni.
«Vilayat Horasan» «Crocus City Halldaki» ücüm mesülietini öz boynuna alğan olsa da, Rusiye memurları, hususan Kreml yolbaşçısı Vladimir Putin ücümde «Ukrayınanıñ izi» bar, dep ayta. Bloomberg menbaları bildirgenine köre, Rusiye siyasiy ve iş elitaları teraktta Ukrayınanıñ qolu bar olğanına inanmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
