Türkiye İsveçiya ve Finlândiya ögünde NATO qapularını qapatmay, amma telükesizliknen bağlı muakezereler, hususan kürd separatistlerine yardım toqtatıluvını muzakere etmege istey. Bu aqta Türkiye prezidentiniñ mesleatçısı İbrahim Kalın bildirdi.
Eki memleketniñ NATOğa kirmesine qarşı çıqqan Rusiyeniñ fikri Türkiye içün esas degil, dep ayttı Kalın.
Türkiye Tış işler naziri Mevlüt Çavuşoğlu Berlindeki NATO memleketleri Tış işler nazirleriniñ körüşüvi ögünde aytqanına köre, Türkiye cemaatınıñ büyük qısmı Finlândiya ve İsveçiyanıñ Şimaliy atlantik ittifaqına kirmesine qarşı çıqa. Çavuşoğlu aytqanına köre, bu ciddiy bir mesele ve Türkiye onı ittifaqdaşlarınen muzakere etmege niyetlene.
NATO memleketleriniñ ekseriyeti Finlândiya ve İsveçiyanı İttifaqqa qabul etmege azır. Türkiye açıq itiraz bildirgen yekâne memleket oldı.
Ankaranıñ fikirince, Finlândiya ve İsveçiya Türkiye, ABD ve AB terror teşkilâtı olaraq tanığan Kürdistan İşçi Firqasına yardım köstereler.
Finlândiya ve İsveçiya kürd faallerine siyasiy sığınaq bere, Suriyedeki kürd birleşmelerine qoltutalar. Olar ABD yardımınen İslâm devleti terror gruppirovkasına qarşı cenkleşe, lâkin Türkiye olarnı telükesizligi içün havflı köre.
NATO memleketleriniñ Tış işler nazirleri Berlindeki körüşüvden evel Türkiye Finlândiya ve İsveçiyanıñ qoşuluvını blok etmeycek, dep eminliknen bildirdi. Diger 29 ittifaq memleketi olarnı qabul etmege razı.
Finlândiya prezidenti Sauli Niiniste mayısnıñ 14-nde Rusiye prezidenti Vladimir Putinge telefon etip, Helsinki kelecek bir qaç kün devmında NATOğa kirüv arizasını berecek, dep haber etti. Niiniste Putinge soñki aylarda Rusiyeniñ areketleri Finlândiyanı telükesizligine diqqat ayırmağa mecbur etti, dep ayttı, şunıñ içün memleketniñ reberligi arbiy ittifaqqa kirüv esnasını başlatmağa qarar berdi.
Bu yıl fevral ayında Ukrainağa istilâ etüv sebeplerinden biri olaraq Rusiye akimiyeti memleketniñ NATOğa kirmege tırışqanını ayttı, olarnıñ fikirince, bu adım Rusiye telükesizligine zarar ketire bile.
