Türkiye prezidenti Recep Tayyip Erdoğan Kreml yolbaşçısı Vladimir Putinge Ukrayınanen bağlı barışıq muzakerelerini yañıdan başlatmağa teklif etecek ola, dep haber ete Rusiye devlet agentligi Türkiye lideriniñ memuriyetindeki menbalarına esaslanıp.
Hürriyet gazetasınıñ malümatına köre, Putinni avgustnıñ soñki aftası Türkiyede bekleyler. Türkiye ve Rusiye prezidentleri aşlıq añlaşmasınıñ yañıdan başlatıluvını muzakere etecekler. Bu mevzu avgustnıñ 7-nde Türkiye ükümetiniñ toplaşuvında esas meselelerden biri olacaq.
«Rusiye-Ukrayına cenkiniñ ketişatı, cenkni bitirmek içün Türkiyeniñ diplomatik bağları ve Rusiye ayırılğan Qara deñiz aşlıq teşebbüsi muzakere etile. Bu ceetten aşlıq koridorı tekrar çalışıp başlasın dep, Türkiye esaslanacaq strategiyalar ğayrıdan baqılacaq. Bundan ğayrı, Rusiye prezidenti Vladimir Putinniñ bu ay soñunda Türkiye ziyareti baqılacaq», – dep yaza Hürriyet.
Avgustnıñ 2-nde Putin ve Erdoğan telefonda laf etip, Rusiye lideriniñ Türkiye ziyareti aqqında añlaştılar.
Soñki aftaları Erdoğan Kreml yolbaşçısınen Ukrayına aşlığını limanlardan Qara deñizge çıqarmağa imkân bergen añlaşmanıñ yañıdan başlatıluvını laf etmege istegenini çoq ayttı.
Rusiye akimiyeti iyülniñ 17-nde kübreniñ Rusiyeden ihracat añlaşmalarınıñ bir qısmı yerine ketirilmedi dep, aşlıq añlaşmasından çıqa, dep bildirdi. Bundan soñ Rusiye akimiyeti aman-aman er kün Odesa vilâyetine ateş açıp, aşlıq añlaşması içün qullanılğan liman infrastrukturasını yoq etip başladı. Rusiye Mudafaa nazirligi iyülniñ 19-nda Qara deñizden Ukrayına limanlarına ketken bütün gemilerni cenk nişanları olaraq, gemilerniñ bayraqları ait olğan memleketlerni ise Ukrayına tarafınıñ cenk iştirakçileri olaraq sayacaq, dep ilân etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
