Türkiyeniñ Ukraina elçihanesi faaliyetini Kyivge qaytara, dep bildire aprelniñ 5-nde.
«Faaliyetimizni vaqtınca Çernovtsığa aldıq, işimizniñ logistik merkezi oldı. Bugün ise evimizge, Kyivge qayttıq», – dep aytıla haberde.
Diplomatik temsilcilik aprelniñ 6-nda işini, hususan konsullıq hızmetlerini ğayrıdan tiklemege planlaştıra.
Türkiye elçihanesi martnıñ 11-nde işine Çernovtsıdan devam etecek, dep haber etken edi.
Aprelniñ 5-nde Tış işler nazirligi Estoniyanıñ Ukraina elçisi Kaymo Kuusk Kyivge qaytmağa planlaştıra, dep bildirdi.
Bundan evel Litvaniya elçisiniñ Ukraina paytahtına qaytacağını Litvaniya Tış işler naziri Gabriyelüs Landsbergis ilân etti.
Diplomatik müessiseler Rusiyeniñ ücüminden evel ve fevralniñ 24-nde ücümden soñ ofislerini Kyivden Ukraina ğarbine ve qomşu memleketlerine taşığan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net/. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
