Rusiyeniñ Ukrayınağa qarşı cenkinde Türkiye içün «mediator rolü» müim ola, çünki «bu memleketniñ tarihiy siyaseti ve iç iqtisadiy vaziyeti» bar, dep tüşüne Ukrayınanıñ Türkiye elçisi Vasıl Bodnar. Bu aqta o, Azatlıq Radiosına bergen intervyüda ayttı.
«Bütün siyaset Atatürkniñ vasiyetine köre yapıla: «evdeki barışıq – dünyadaki barışıq». Bu ğaye türk cemiyetiniñ temelindedir. Şunıñ içün aracı ğayretleri de hususan iç saylayıcılarğa esaslana. Diger taraftan, ebet, Türkiye bu cenkni istemey, çünki iqtisadiyat büyük zarar köre. Mudafaa cenkimiz olarnıñ inflâtsiya seviyesine, ananeviy mal (zahire, künaylan yağı, maden) ketirilüvine tesir etti. Bu da Türkiye tarafını mediatorlıq ve barışıq qıdıruvında daa faal olmasına mecbur ete», – dep qayd etti diplomat.
Aynı vaqıtta, Vasıl Bodnarnıñ aytqanına köre, Türkiye Rusiyege qarşı halqara sanktsiyalarğa qoşulmağa azır olmaycaqtır.
«Er angi memleketke qarşı sanktsiyalarğa Türkiye bir vaqıt qoşulmay, amma Türkiye sanktsiyalardan qurtulmaq içün qullanılacaq şaraitler yaratmaycaq, dep bildire. Bu, birinciden, iqtisadiy menfaatlarnen bağlı. Ve memleket içindeki vaziyet pek yahşı olmağanını bilemiz. Saylavlar ögüne kimse memleketke resurs ketirilüvini sıñırlamaycaq», – dep añlattı diplomat.
Rusiyeniñ Ukrayınağa qarşı büyük arbiy istilâsı başlağan soñ Türkiye Ukrayına-Rusiye muzakereleriniñ keçirilüvi içün meydançıq oldı. Türkiye prezidenti Recep Tayyip Erdoğan zahire añlaşmasınıñ saqlap qalmasında rol oyadı, soñra Ukrayına prezidenti Volodımır Zelenskıy oña teşekkür etti.
Aynı vaqıtta Türkiye Rusiyege qarşı halqara sanktsiyalarğa qoşulmadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
