Ukrayina Yuqarı Radasında sovet rejiminiñ eñ ağır cinayetlerinden biri - 1944 senesi Qırımtatar halqınıñ sürgünligi ve genotsidine bağışlanğan sergi açıldı, dep haber ete Qırımtatar Resurs Merkezi.
Qırımtatar Resurs Merkezi tarafından Qırımtatar Milliy Meclisiniñ destegi ile yaratılğan ve Ukrayin ressamı Andriy Yermolenko tarafından yaratılğan "Tünevin takbih etmegeniñiz bugün tekrarlana"sergisi. Ekspozisiya Qırımnıñ işğalden qurtarıluvı, insan aqları ve Ukrayinanıñ tamır halqlarınıñ aqlarını qorçalav oğrunda 12 yıllıq küreş devamında yapılğan 17 plakattan ibaret.
Serginiñ maqsadı, Ukrayin cemiyetine ve halqara toplulıqqa 1944 senesi Qırımtatar halqınıñ sürgünligi genotsid cinayeti olğanını hatırlatmaq ve sovet rejiminiñ cinayetleri ve Rusiyeniñ Qırımtatar halqına ve bütün Ukrayina halqına nisbeten zemaneviy siyaseti arasında paralellerni köstermektir.
Qırımtatar Milliy Meclisiniñ reisi Refat Çubarov açılış vaqtında bu sergi tek tarihiy hatıra degil, zemaneviy dünya içün tenbi olğanını qayd etti.
"Sergi tek 1944 senesi yüz bergen facia aqqında hatırlatmaq degil de, cezasız qalğan yamanlıqnıñ tekrarlana bilecegine de şaatlıq ete. O, keçmiş ve şimdiki zaman arasında bağ aqqında ayta, keregi kibi takbih etilmegen cinayetler tekrarlana bile", — dep qayd etti Çubarov.
Ukrayina Yuqarı Radasınıñ reisi Ruslan Stefançuk, Qırımtatar halqınıñ sürgünligi Rusiyeniñ çoq yıllıq cezasız qalğanınıñ daa bir delili oldı, dep qayd etti.
"Cezasız yamanlıq tekrarlana, cazasız yamanlıq kene qayta. Ve bugün bizim vazifemiz — parlament seviyesinde, halqara toplulıq seviyesinde - bu yamanlıq cezalandırılsın dep, er şeyni yapmaq", — dedi Stefançuk.
Ukrayina halq deputatı Tamila Taşeva Qırımtatar halqı genotsidi mevzusınıñ halqara imayesi ve Qırımnıñ işğalden qurtarıluvı oğrunda küreşke qol tutuvnıñ müimligini qayd etti.
Qırımtatar Resurs Merkeziniñ idare reisi, Qırımtatar Milliy Meclisiniñ azası Eskender Bariyev qayd etti ki, serginiñ Ukrayina Yuqarı Radasında keçirilmesi hususiy emiyetke saip, çünki 2015 senesi Ukrayina parlamenti Qırımtatar halqınıñ sürgünligini genotsid olaraq tanığan edi.
"Bugün biz Ukrayina Yuqarı Radasınıñ binasında serginiñ açıluvını tesadüfen yapmaymız. Birinciden, sürgünlikni genotsid olaraq tanığan içün Yuqarı Radağa teşekkür bildirmege isteyim. Bu qarar ve beraberlikte yapılğan sistemli işimiz sayesinde dünyanıñ doquz devleti Qırımtatar halqınıñ sürgünligini genotsid olaraq tanıdı", — dep qayd etti Bariyev.
O şunı da qayd etti ki, Rusiyeniñ 2014 senesi Qırım işğali aynı şu genotsid siyasetiniñ devamı oldı: 2014 senesi işğali Qırımtatar halqı ve umumen Ukrayinlerge nisbeten genotsid siyasetiniñ devamıdır. Bizim içün bu tek keçmiş aqqında degil. Adalet, tarihiy hatıra ve kelecek aqqında.