Energodar şeer yolbaşçısı Dmıtro Orlov Azatlıq Radiosınıñ «Novını Priazovya» leyhasına izaat berip, Rusiye ordusınıñ şeerde ilân etken «tahliyesinden» soñ «belli bir ajiotaj» körüne, dep ayttı.
«Tibbiy-sanitar bölükten donatmalar, bilgisayar, vesiqalar, Memuriy hızmet merkezinde yerleştirgen pasport masasını çıqarğanlar. Evelden olğan ev interneti çalışmay, aşayt tükânları, aphaneler çalışmay. Bazı aş ve ilk ihtiyac şeylerinde ajiotaj bar. Yaqarlıq stantsiyaları ve bankomatlar da boş», – dep bildirdi Orlov.
Onıñ bildirgenine köre, işğalci akimiyet Ukrayına Silâlı quvetleriniñ qarşı ücümini beklep, vesiqalarını çıqara.
Mayısnıñ 5-nde Rusiye kontrolindeki işğal etilgen Zaporijjâ vilâyetiniñ akimiyeti cebege yaqın 18 mesken yerniñ tahliyesi aqqında bildirdi.
MAGATE Rusiye ordusı zapt etken Zaporijjâ atom elektrostantsiyasınıñ çoqusı hadimi yaşağan Zaporijjâda işğal etilgen Energodar şeeriniñ sakinleri tahliye etilip başlandı, dep tasdıqladı. Şeer yolbaşçısı Dmıtro Orlov işğalci akimiyet Energodardaki memuriy idarelerni qapatıp, vesiqa ve donatmalarnı çıqara.
Mayısnıñ 9-nda saba Rusiye ordusı Zaporijjâ vilâyetiniñ işğal etilgen qısmından Ukraynı vatandaşları ve Ukrayına müessiseleriniñ mal-mülkini Qırım tarafına çıqara, dep bildirdi Ukrayına Silâlı quvetleriniñ Baş ştabı.
Ukrayına Silâlı quvetleriniñ Baş ştabı bildirgenine köre, Zaporijjâ vilâyetiniñ işğal etilgen qısmından Rusiye tarafı işğalci akimiyetni, halq milisi ve qorantalarını tahliye ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
