Rusiyeniñ Krasnodar ülkesindeki Tuapsede aprelniñ 28-ne keçer gecesi dronlarnıñ ücüminden soñ cermay zavodında kene yanğın oldı, dep bildirdi regionnıñ operativ ştabı.
"Tuapsede uçucısız parçaları tüşkeninden cermay zavodında yanğın oldı. Yaralanğanlar yoq. 122 insan ve 39 tehnika yanğınnı söndürdi", – dep aytıla haberde.
Astra Telegram kanalı OSINT-talilini yapıp, Tuapse cermay zavodı yana, dep bildirdi, deñiz terminalında keçken ücümlerden soñ büyük yanğın söndürilgeninden tek dört kün keçti, dep qayd etti.
Aprelniñ 28-ne keçer gecesi Tuapse sakinleri yerli cermay zavodında çoq sayıda patlav ve yañı yanğın aqqında haber etken edi.
Ukrayina tarafı yañı ücümni şimdilik izaatlamadı.
Ukrayina Tuapsedeki cermay obyektlerine aprelniñ 16-nda ve 20-nde ücüm etti. Ukrayina Silâlı quvetleriniñ Baş ştabı haber etkenine köre, aprelniñ 20-nde ücüm neticesinde 24 rezervuar yoq etildi ve dördü zarar kördi. Büyük yanğın bir qaç kün devam etti. Avada yanuv parçaları bar edi, Tuapse sakinleri "cermay yağmurları" aqqında haber etti, cermay mahsulatı deñizge tüşti. Yerli akimiyet aprelniñ 23-nde ilk sefer cermay zavodındaki yanğın sebebinden ekologik felâket olğanını tanıdı.
Ukrayinağa qarşı Rusiyeniñ büyük istilâsı başlağan soñ Rusiyede ve işğal etken topraqlarında çeşit obyektler ava ücümlerine oğray. Eñ sıq 2024 ve 2025 seneleri ücüm sebebi cermay zavodları ola. Ukrayinanıñ işğal altındaki topraqlarında da Rusiye obyektleri ücümlerge oğray.
Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.
