ABD ve Rusiye prezidentleri Donald Trump ve Vladimir Putin cuma künü Yaponiyanıñ Osaka şeerinde «Büyük yigirmi» (G-20) sammitinde körüşti. Bu aqta Azatlıq Radiosı haber ete.
Muzakereler 1 saat 20 daqqa devam etti. Körüşüvde eyyet azaları da iştirak etti.
Beyaz Saraynıñ bildirgenine köre, prezidentler İran, Suriye, Venesuela ve Ukraina vaziyetlerini, em de silâ kontroli ve eki taraflı munasebetlerni muzakere ettiler.
Haber etilgenine köre, eki lider ABD ve Rusiye arasındaki munasebetlerniñ eyilişmesi eki memleket ve bütün dünyağa kerek, dep añlaştılar.
Kreml Trump memuriyeti ile muzakere neticelerini şimdilik izaatlamadı.
Keçken seneniñ soñunda Trump Buenos Airesta «Büyük yigirmi» sammitinde Putin ile keçirecek olğan körüşüvni lâğu etken soñ bu körüşüv ilk oldı. O vaqıt körüşüv işğal etilgen Qırım yalısında Rusiye sıñırcıları tarafından 24 ukrainalı deñizciniñ zapt etilüvi olğan edi. Bu müddet içinde prezidentler tek bir kere mayıs ayında telefonda laf etken ediler.
Trump ve Putinniñ birinci tolu formatlı körüşüvi 2018 senesi iyülniñ ortasında Helsinkide oldı. Eki taraf da muzakereler yahşı keçkenini qayd etken edi. 2018 senesi noyabr ayında eki memleketniñ liderleri Birinci cian cenki bitkeniniñ yüz yılı munasebetinen Parijde keçirilgen tedbirde qısqa körüşken ediler.
