Beyannameniñ metni o vaqıt Washingtonda bulunğan qırımtatar halqınıñ lideri Mustafa Cemilevge teslim etildi. Çubarov beyanname metnini de aydınlattı:
«Rusiye Ukrayinağa istilâ etip ve 2014 senesi Qırımnı ilhaq etmege tırışıp, demokratik devletler riayet etken esas halqara printsipni bozmağa tırıştı: iç bir memleket digeriniñ sıñırlarını küçnen deñiştirip olamaz.
Birleşken Devletler Kremlniñ halqara uquqqa zıt bir şekilde küçnen zapt etilgen topraqta suverenitetni tiklev talaplarını tanımama siyasetini kene tasdıqlay. İttifaqdaş, ortaqlar ve halqara toplulıqnen beraber Birleşken Devletler Rusiyeniñ Qırım ilhaqı ıntıluvını red ete ve bu siyasetni Ukrayina topraq bütünligi ğayrıdan tiklengenine qadar saqlaycaq.
Rusiye yapqanlarınen ulu devletke lâyıq olmağan şekilde areket etti ve özüni halqara toplulıqtan uzaqlaştırdı».
Semafor neşiri menbalarına esaslanıp, Beyaz saray barışıq añlaşması çerçivesinde Qırımnı Rusiye dep tanıma imkânını baqa, dep bildirdi.
Trump martnıñ 18-nde Putinnen telefonda laf etmege planlaştıra, dep bildirdi. Onıñ aytqanına köre, muzakere «belli aktivler bölüginen» bağlı olacaq, «topraq ve elektrik stantsiyaları» aqqında aytılacaq.
Kreml Trump ve Putinniñ subeti planlaştırıla, dep tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
