ABDniñ saylanğan 47-nci prezidenti Donald Trumpnıñ inauguratsiyasından soñ «Ukrayinanıñ adaletli barışıqnı yaqınlaştırmaq içün qoşma şansı olacaq», dep qayd etti Tış işler naziri Andriy Sıbiğa cemaat munaqaşası vaqtında, metnini LB.ua derc ete.
Nazirden yanvarniñ 21-nde Ukrayinağa barışıq kelecegine şahsen inanamı dep soradılar. Belli olğanına köre, yanvarniñ 21-si saylav kampaniyası vaqtında Rusiye ve Ukrayina arasındaki cenkni «24 saat içinde» bitirmege söz bergen Trumpnıñ inauguratsiyasınıñ ertesi künü olacaq.
Sıbiğa «bu adiy bir sual degil» dep cevap berdi ve barışıq içün «qoşma bir şans» körgenini qayd etti.
«Eminim, biz Ukrayina içün adaletli barışıqnı yaqınlaştırmaq içün qoşma bir şans, qoşma imkânlar alacaqmız. Men bundan eminmim», – dedi Ukrayina Tış işler naziri.
Sıbiğa, matbuat vastalarında ABDniñ kelecek prezidentiniñ Ukrayinanen bağlı «areket variantları» olaraq peyda olğan barışıq tekliflerini de izaatladı. Ukrayina Tış işler naziri qayd etti ki, «resmiy teklifler tek yanvarniñ 20-nden soñ peyda ola bile».
«Şimdiki vaziyetke köre, bizge çeşit matbuatta çeşit sesler tarafından seslendirilgen er angi vesiqalarğa, kâğıt olmağanlarğa, ğayelerge kereksiz duyğularsız baqmaq kerek. Bu yerde biz em dünyanıñ, em de Ukrayinanıñ reaktsiyasınıñ sınavı olğanına esaslanmalımız», – dedi Sıbiğa.
Bundan evel, dekabrniñ 7-nde, Trump Parijde Ukrayina prezidenti Volodımır Zelenskıy ve Frenkistan prezidenti Emmanuel Makronnen körüşti. Bu körüşüvni izaatlap, Trump cenkni tezden bitirmek kerek, dep qayd etti, Zelenskıy ise «küç yardımınen barışıq» aqqında ayttı.
«Bu (cenkni) kâğıt ve bir qaç imzanen bitirmek imkânsız. Kefaletsiz toqtatılğan ateş ise kene yana bile, Putin bunı endi yapqan edi. Ukrayin yigitleri ve qızları ölmeycegini kefil etmek içün barışıqnıñ qaviy olğanını tasdıqlamaq ve işğalge köz yummamaq kerek», – dep ayttı Ukrayina prezidenti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
