Cenkni bitirüvnen bağlı birinci muzakereler yañı saylanğan prezident Donald Trumpnen olacaq, dep qayd etti Ukrayina prezidenti Volodımır Zelenskıy amerikalı podkaster Leks Fridmanğa bergen intervyüsında.
Zelenskıy cenkni bitirüvni muzakere etmek içün Trumpnen olacaq körüşüvni ilân etti.
«Mence, yanvarniñ 25-nde ya da başqa bir kün başta Trumpnen oturamız. Biz cenkni ve Putinni (Rusiye prezidenti Vladimir Putin – QA) nasıl etip toqtatmaq mümkün añlaşamız», – dep qayd etti o.
Prezidentniñ qayd etkenine köre, «Trump Ukrayina içün küçlü havfsızlıq kefaletlerini teklif etse, o vaqıt ruslarnen bir subet ola bile».
«Ve tek bu şekilde, üçümiz oturıp degil», – dep qoştı o.
Daa evel Amerika cenkni tedqiq etüv institutınıñ (ISW) talilcileri Kreml Ukrayinağa qarşı cenkte uzlaşuvğa ıntılmay, onıñ bütünley teslim olmasını istey, dep isbatlay edi.
Kyiv Rusiyege iç bir topraq uzlaşuvına ya da davanıñ buzlatılmasına razı olamaycağını bir qaç kere bildirdi. Böyle buzlatuv, Ukrayina akimiyetiniñ fikirince, Rusiyege tek Ukrayinağa qarşı yañı bir ücümge daa yahşı azırlanmağa yardım etecek.
Prezident Volodımır Zelenskıy dekabr ayında 2025 senesi Ukrayina «quvetli olmaq ve diplomatiyağa keçmek» içün elinden kelgenini yapacağını ayttı.
O, Ukrayina ordusınıñ Rusiye işğal etken bazı topraqlarnı azat etmek içün küçü yetmegenini ve diplomatik yollar qıdırmaq kerekligini qayd etti. Ve Sky News ile subette Zelenskıy Ukrayina topraqlarınıñ ükümet tarafından kontrol etilgen qısmı NATO şemsiyesi astına alınması şartınen cenkniñ sıcaq fazası biter, bu ise işğal etilgen topraqlarnı «diplomatik yolnen» qaytarmağa imkân berecek, dep tahmin etti.
ABDniñ yañı saylanğan prezidenti Donald Trumpnıñ Ukrayina mahsus vekili Kit Kellog bundan evel Ukrayina ve Rusiye barışıq muzakerelerine azır olğanlarına işanğanını bildirgen edi.
Rusiyeniñ Tış işler naziri Sergey Lavrov dekabrniñ 6-nda Ukrayinada barışıq tek Ukrayina NATO azalığından vazgeçse ve öz topraqlarınıñ bir qısmını coysa, mümkün olğanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
