ABD prezidenti Donald Trump Ukrayinadaki zıddiyetniñ eki tarafınıñ liderleri – Rusiye prezidenti Vladimir Putin ve Ukrayina prezidenti Volodımır Zelenskıynıñ soñki beyanatlarından memnün degil. Bu aqta bazarertesi künü keçirilgen brifingde Beyaz saraynıñ matbuat kâtibi Karoline Leavitt bildirdi.
Onıñ aytqanına köre, Trump «Rusiye ve Ukrayina arasında barışıq añlaşmasına irişmek içün toqtamayıp çalışa». Tam olaraq angi sözler onı açuvlandırdı Leavitt aytmadı.
Trump bundan evel Putinniñ Zelenskıynıñ qanunsızlığı ve Ukrayinada tış idare kirsetilmeli degen sözleri açuvlandırdı, dep aytqan edi. O, Rusiyeni yaqın vaqıtta barışıqqa razı olmasa, cermay ihracınıñ ekinci alımınen qorquzdı. Trumpnıñ fikirince, Putin «añlaşmağa» razı olacaq. «Onıñ cermayına qarşı ekinci alım kirsetmege istemeyim, amma işini yapamay dep tüşünse edim, böyle yapar edim», – dedi Trump Putin aqqında.
ABD devlet departamenti Washington (Kyiv ve BM kibi) Putinniñ ğayesini red etti, dep tasdıqladı.
«Ukrayina anayasa demokratiyası ola, ve onıñ idaresini Anayasa ve ukrayin halqı belgiley», – dep bildirdi müessise vekili Tammy Bruce.
ABD prezidenti Zelenskıynı tenqit etip, ABD teklif etken Ukrayinada faydalı qazıntılar añlaşmasınıñ variantını imzalamağa istemey, dep bildirdi. Trumpnıñ aytqanına köre, Zelenskıy vesiqa imzalamanıñ şartı olaraq Ukrayinanıñ NATO azalığını ayttı. ABD prezidenti qayd etkenine köre, buña razı degil, çünki Ukrayinanıñ NATO ıntıluvı Putin içün Ukrayinağa qarşı cenkni başlatmaq içün manaçıq oldı, dep ayttı.
Zelenskıy tabiat resursları añlaşması çerçivesinde NATO azalığı aqqında aytmağan edi. Onıñ aytqanına köre, ABD teklif etken leyhanıñ bazı maddelerinen razı degil, hususan Ukrayina 2022 senesinden başlap Rusiyeniñ büyük istilâsı başlağanından kösterilgen bütün yardımnı ivaz etmege mecbur olğanını red etti. Zelenskıynıñ aytqanına köre, Ukrayina bu yardımnı bir borc olaraq qabul etmege azır degil, çünki ABDniñ sabıq memuriyeti onı qarşılıqsız bere, dep bildirgen edi.
Prezident Trump Ukrayinadaki cenkni tez bitirmege tırışa, dep aytqan edi. Ukrayina ABDniñ 30 künlik ateşkes teklifine razı oldı, lâkin Rusiye barışıq razılığını daa bermedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
