Saylanğan ABD prezidenti Donald Trump Rusiye lideri Vladimir Putin onıñnen körüşmege istegenini bildirdi. «Biz bunı teşkil etemiz», – dedi Trump yanvarniñ 9-nda Florida ştatındaki Mar-a-Lago mülkünde cumhuriyetçi gubernatorlarnen körüşüvde.
O, olacaq muzakereler içün bir müddet bermedi.
«Prezident Putin körüşmege istey. O, bunı açıqtan-açıq ayttı, biz bu cenkni bitirmek kerekmiz», – dedi Trump.
Yanvarniñ 7-nde ABDniñ saylanğan prezidenti Donald Trump birinci matbuat konferentsiyasında Rusiye prezidentinen körüşüv imkânı aqqında sualge cevap berip, böyle dedi: «Sizge bunı aytıp olamayım, amma bilem ki, Putin körüşmege istey».
Kreml Trumpnıñ yañı beyanatını daa izaatlamadı. Lâkin yanvarniñ 9-nda Rusiye prezidentiniñ spikeri Dmitriy Peskov Putin Trumpnıñ bağ qurmaq istegini alğışlay, amma şimdige qadar Kreml tarafından iç bir resmiy rica kelmegenini bildirdi. «Vazifesine başlağan soñ eñ yüksek seviyede bağ qurmaq siyasiy iradesi qalsa, elbette, prezident Putin bunı tek alğışlaycaq», – dedi o ve Trump öz vazifesine kiriş yapqanını beklemek doğru olur, dep qayd etti.
Saylav kampaniyası vaqtında yañı saylanğan prezident öz vazifesine kiriş yapqan soñ 24 saat içinde Rusiyeniñ Ukrayinadaki cenkini bitire bilecegini aytqan edi. Matbuat konferentsiyasında Trump cenkni altı ay içinde bitirmege ümüt ete, dep bildirdi.
«Ümüt etemiz ki, altı aydan tez», – dedi Trump, cenkniñ altı ay içinde bitmesini teşkil ete bilecekmi sualine cevap bergende.
Trumpnıñ Beyaz Sarayğa qaytması üç yılğa yaqın devam eteyatqan cenkke ve ola bilecek muzakerelerge nasıl tesir etecegi aqqında bellisizlikniñ sebebi ola. Amma Trump «onı tüzetmege» qararlı olğanını ayttı ve bu «qıyın» olğanını qoştı.
Ukrayina prezidenti Volodımır Zelenskıy Trump Rusiyenen cenkni bitirüvde ve Putinni toqtatmağa yardım etmekte müim bir rol oynay bile, dep aytqan edi.
Yanvarniñ 5-nde aydınlatılğan amerikalı podkaster Leks Fridmanğa bergen intervyüsında Ukrayina prezidenti Volodımır Zelenskıy cenkni bitirüvnen bağlı birinci muzakereler yañı saylanğan prezident Donald Trumpnen olacaq, dep bildirdi.
«Mence, yanvarniñ 25-nde ya da başqa bir kün başta Trumpnen oturamız. Biz cenkni ve Putinni (Rusiye prezidenti Vladimir Putin – QA) nasıl etip toqtatmaq mümkün añlaşamız», – dep qayd etti o.
Prezidentniñ qayd etkenine köre, «Trump Ukrayina içün küçlü havfsızlıq kefaletlerini teklif etse, o vaqıt ruslarnen bir subet ola bile». «Ve tek bu şekilde, üçümiz oturıp degil», – dep qoştı o.
Daa evel Amerika cenkni tedqiq etüv institutınıñ (ISW) talilcileri Kreml Ukrayinağa qarşı cenkte uzlaşuvğa ıntılmay, onıñ bütünley teslim olmasını istey, dep isbatlay edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
