ABD prezidenti Donald Trump Rusiye prezidenti Vladimir Putinnen telefonda laf etti. Tahminlerge köre, esas mesele Ukrayinada cenkniñ toqtatıluvı oldı.
Subet eki buçuq saat devam etti. Eñ yaqın vaqıtta Trump matbuat konferentsiyasını keçirecek, dep bildire NBC News.
Beyaz Saray memuriyetiniñ yolbaşçı muavini Daniel Scavino subet saat 10:00-da (Qırım vaqtınen 17:00-de) başlandı, dep bildirdi.
«Subet yahşı keçe» – dedi Scavino.
NBC ve CBS Amerika mediaları menbalarına esaslanıp, martnıñ 18-nde muzakereler yekünlendi, dep bildirdi, TASS Rusiye devlet haber agentligi Kremlniñ matbuat kâtibi Dmitriy Peskovnıñ eki memleketniñ liderleri munaqaşalarını bitirdi dep aytqanını bildirdi.
Subet mündericesi ya da neticeleri aytılmadı, amma Peskov Moskvada jurnalistlerge o künü subet vaqtında ABd ve Rusiye, Ukrayinadaki cenknen bağlı «bir sıra mesele köterilecek», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
