ABD prezidenti Donald Trump Rusiye lideri Vladimir Putinge Ukrayina ile barışıq añlaşmasını tizmesi içün bergen yañı müddetni aydınlattı.
«Men 10 ya da 12 kün şeklinde yañı müddetni ilân etem», – dep ayttı ABD yolbaşçısı iyulniñ 28-nde İskoçiyada Büyük Britaniyanıñ baş naziri Keir Starmer ile muzakerelerden soñ keçirgen matbuat konferentsiyasında.
Trumpnıñ aytqanına köre, «bugünki künden 10 ya da 12 kün sayılacaq».
Bugün ABD lideri Ukrayina ile barışıq añlaşması içün Rusiyege berilgen 50 künlik müddetni qısqartacaq, dep bildirdi. Trumpnıñ aytqanına köre, onıñ «prezident (Rusiye prezidenti Vladimir) Putinden közü qayttı» ve o, müddetni qısqartmaq niyetinde, çünki, onıñ fikirince, onıñ tekliflerine «cevabını» ve ne olacağını bile.
Trump tam eki afta evelsi – iyulniñ 14-nde Rusiyege 50 künlik müddet berdi.
Keçken aftanıñ soñunda ABD devlet kâtibi Marco Rubio prezident Trumpnıñ Rusiyeniñ Ukrayina ile cenkte yapqanlarından sebep «sabrı bite» ve Moskvadan cenkni bitirecek adımlarnı «beklemek içün istegi qalmay», dep ayttı.
İyulniñ 14-nde Trump Rusiyeni ve şahsen Putinni barışıqqa irişmege istemegeni içün sert bir şekilde tenqit etip, Ukrayinada barışıq añlaşmasını tizmesi içün 50 kün bere. Bu müddet bitken sentâbrniñ 3-nden soñ Trump, onıñ aytqanına köre, sanktsiyalar kirsetmege azır – birinciden Rusiyege ve ondan energetik resurs satın alğan memleketlerge qarşı yüksek gümrükler. Rubio Fox News içün intervyüsında Rusiyeden cermay alğan Qıtay qoltutmasa edi, Putin «cenkke dayanamaz edi», dep qayd etti.
Trump ABD ortaqlarına Ukrayinanıñ ihtiyacları içün silâ satmağa azır olğanını ilân etti. Almaniyanen beraber bir qaç memleket iştirak etmege azır, dep bildirdi.
Rusiye Trumpnıñ aytqanlarına pek muqayt olıp cevap berdi. Rusiye vekilleri barışıq istey, amma belli şartlarnen, dep ayta – Kyiv ise bunı bir teslimiyet olaraq köre. Birinciden Ukrayinanıñ topraqlarından vazgeçmesi aqqında aytıla – Moskva kontrol etmegen ya da bir vaqıt kontrol etmegen topraqlarından.
