ABD prezidenti Donald Trump Rusiye prezidenti Vladimir Putinni barışıq istegenini köstermesine ve Ukrayinada cenk areketlerini toqtatmasına kene çağırdı. Bu aqta o, bazar künü aqşamı bildirdi.
«Men ateşni toqtatıp, añlaşma imzalamasını isteyim», – dedi Trump jurnalistlernen laf etip.
Onıñ aytqanına köre, yaqın eki aftada Putin kerçekten barışıq isteymi-yoqmı körecek. Siyasetçi qayd etkenine köre, ABDniñ, Rusiye barışıq istemese, yapa bilecek areketleri bar.
Trump Ukrayina prezidenti Vladimir Putinnen Romadaki körüşüvine müsbet qıymet kesti.
ABD Devlet kâtibi Marco Rubio aprelniñ 27-nde bildirgenine köre, Rusiye ve Ukrayina arasında barışıq añlaşması yaqın vaqıtta tizilmeli, Washington ise aracılıq yapmağa devam etmeli añlamağa istey. Trumpnıñ memuriyeti ilerilevni ne qadar beklemege azır aytmadı.
Bazarertesi sabası Rusiye Tış işler nazirligi Rubio ve Rusiye Tış işler naziri Sergey Lavrov arasında aprelniñ 27-nde aqşam olğan telefon subeti aqqında haber paylaştı. «Esas diqqat Ukrayina buhranı mevzusına ayırıldı», – dep aytıla haberde.
Bundan ğayrı, taraflar «uzun müddetli turğun barışıqqa işançlı yol aqqında keliştirmek maqsadınen muzakerelerni başlatmaq içün peyda olğan evelki şartlarnı pekitüvniñ müimligini qayd ettiler», dep haber etile. Devlet departamenti Rubio ve Lavrov arasındaki subet aqqında daa haber etmedi.
Bazarertesi künü Kremlniñ matbuat kâtibi Dmitriy Peskov Trumpnıñ soñki fikirlerini izaatlamaq ricasına cevap berip, Rusiye «mahsus arbiy operatsiyasını» (Rusiye Ukrayinağa qarşı cenkini böyle adlandıra – QA) devam ete, dep bildirdi. Aynı vaqıtta o, Moskva Ukrayinanen muzakerelerge azır olğanını, amma Kyivden azır olğanına dair işaret bekley, dep bildirdi.
Soñki ayları Washington cenkni toqtatuv ğayretlerini faalleştirdi. ABD prezidenti Donald Trump yanvar ayında inauguratsiyasından evel Rusiyeniñ Ukrayinağa qarşı istilâsını 24 saat içinde toqtata bile, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
