ABD prezidenti Donald Trump Rusiyeniñ Ukrayinağa qarşı cenkini toqtatuv muzakereleri "yahşı" kete, dep bildirdi.
"Bu eki lider – Putin ve Zelenskıy arasında – büyük nefret bar… Biz laf etemiz. Er şey yahşı kete… Er kes bu cenkten boldurdı. Onı toqtatmaq kerek", – dedi Trump, tafsilâtlarını aytmayıp, Palm Beachte, Florida ştatı, dekabrniñ 22-nde jurnalistlernen laf etip.
Soñki aftaları ABD Moskva ve Kyiv arasında barışıq añlaşmasınıñ tizilmesini istey. Aftalıq muzakereler neticesinde Kyivge daa çoq kelişken vesiqa azırlandı, amma bir qaç pıtraqlı mesele qala, hususan topraq ve telükesizlik kefaletleri.
Dekabrniñ 14-nde ve 15-nde Almaniyada Ukrayina prezidenti yolbaşçılığında Ukrayina eyyetiniñ ABD prezidentiniñ mahsus vekili Steve Witkoff ve ABD prezidentiniñ kiyevi Jared Kushnernen muzakereleri devam etti.
Mayamide (Florida, ABD) dekabrniñ 19-21-nde Ukrayina ve ABD eyyetleri Trumpnıñ barışıq planınen bağlı bir sıra körüşüvler keçirdi. Amerika tarafı RF vekillerinen de körüşti.
Aynı vaqıtta ne ABD ve Rusiye muzakerelerinde, ne de ABD ve Ukrayina körüşüvlerinde bir ilerilev alâmeti olmadı. Kelecekte olacaq körüşüvler aqqında aytılmadı.