ABD prezidenti Donald Trump Amerika Birleşken Devletleri ve İran cenkni bitirüv añlaşmasına irişmesi ve ABD ve İran vekilleriniñ bu raatlıq künleri körüşip olması "pek yahşı körüne", dep ayttı.
"Mence, biz İrannen añlaşma tizmege pek yaqınmız", – dedi Trump jurnalistlerge aprelniñ 16-nda Beyaz saray ögünde.
ABD prezidentiniñ aytqanına köre, aprelniñ 22-nde bitecek eki aftalıq ateşkes devam ettirilmeli ve "añlaşma olmasa… cenk areketleri yañıdan başlaycağından" emin degil.. Müddetini aytmadı.
Trump aprelniñ 16-nda başlağan İsrail ve Lübnan arasında ateşken beyanatını da tekrarlap, Hezbollanen bağlı, dep ayttı.
"Hezbolla" – Lübnannıñ büyük qısmını kontrol etken siyasiy firqa, uruş gruppasıdır. ABD onı terror teşkilâtı dep saya, Avropa Birligi ise tek silâlı qısmını qara cedvelge kirsetti.
Trump tezden Beyaz sarayda İsrail baş naziri Benyamin Netanyahu ve Lübnan prezidenti Jozef Aunnı qabul etmege ümüt ete, dep bildirdi.
ABD prezidenti Donald Trump aprelniñ 11-12-nde İslamabadda keçken Amerika-İran barışıq muzakereleri fevralniñ 28-nde ABD ve İsrailniñ İranğa qarşı ava ücümlerinden başlağan cenkni toqtatacaq añlaşma tizilmesine ketirmegen soñ İrannıñ deñiz qamaçavını kirsetmege emir etti.
Aprelniñ 16-nda İran memurı Reuters agentligine bildirgenine köre, İran ve ABD Pakistannıñ aracılığınen añlaşma yolunda sıñırlı ilerilev yaptı, lâkin ciddiy zıddiyetleri qala.
O, "İrannıñ uran taqdiri ve İrannıñ özek sıñırlavlarınıñ devamlılığı daa çezilmegen eñ davalı meselelerden biri ola", dep qoştı.
Pakistan Tış işler nazirligi haber etkenine köre, muzakerelerniñ ekinci raund künü daa belgilenmedi.
Aprelniñ 14-nde prezident Trump İran ile yañı muzakere raundı bir-eki künden yañıdan başlana bile, dep tahmin etken edi.