Cumhuriyetçi Donald Trump 277 saylav kollegiyası reyini qazandı, bu ise onıñ ABD prezident saylavlarında ğalebe qazanmasını teminley. Bu neticelerni rey berüvni izlegen bir qaç menba, şu cümleden AP ve CNN köstere. ABC News 279 rey aqqında yazdı.
Onıñ raqibi, demokratlarnıñ vekili Kamala Harrisniñ 224 reyi bar.
Reyler daa sayılğanda Trumpnı bir sıra dünya lideri, şu cümleden Ukrayina prezidenti Volodımır Zelenskıy da tebrikledi.
Reyler daa sayılğanda Donald Trump ABD prezident saylavlarında ğalebe qazanğanını endi ilân etti.
ABD prezident saylavları vastalı şekilde keçe. Resmiy olaraq, amerikalılar saylayıcılarğa - mahsus adamlarğa rey bereler, olar dekabr ayında Washingtonda saylayıcılar qoltutqan namzetke öz reylerini berecekler.
Umumen 538 saylayıcı bar. Olarnıñ sayısı er bir ştatta deñişe, halq sayısına köre belgilene. Eñ çoq halq yaşağan ştatlarda saylayıcılar çoqça ola: Californiada 54, Texas ştatında – 40. Daa az (er birinde üç saylayıcı) Şimaliy ve Cenübiy Dakota, Wyoming, Vermont, Delaware, Alâska ve Kolumbiya okrugında.
Belli bir ştatta rey berüvniñ ğalibi o ştattan bütün saylayıcılarnıñ reylerini bir kereden ala (eki istisna bar – Nebraska ve Men ştatları, anda saylayıcılarnıñ sayısı rey berüvniñ fayızına köre bölüne). Neticede ğalebe qazanmaq içün namzetke umumiy olaraq amerikalılarnıñ ekseriyetiniñ reylerini almaq ya da atta ştatlarnıñ ekseriyetini qazanmaq kerekmey, esas şey – halqnıñ ekseriyeti yaşağan ştatlarda er angi bir farqnen ğalebe qazanmaqtır.
Ekseriy ştatlarda neticeni evelden bilmek mümkün, çünki bir namzetniñ açıq üstünligi bar. Böylece, rey berüvniñ neticesini «sallanğan» dep adlandırılğan ştatlar qararlaştıra, anda rey berüv başlanmazdan evel namzetlerniñ ğalebe qazanmaq imkânı tahminen teñdir.
Bu sene yedi ştat «sallanğan» dep sayıldı: Pennsylvania, Georgia, Şimaliy Karolina, Nevada, Arizona, Michigan ve Wisconsin. Umumen olar 93 rey bere. Bu ştatlarnıñ eñ büyügi ve eñ müimi Pennsylvaniadır, anda 19 saylayıcı bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
