ABD prezidenti Donald Tramp, Ukrayina lideri Volodımır Zelenskıynıñ Ukrayina Qırım ilhaqını tanımaycağı aqqında bildirüvlerini tenqit etip, böyle laflar "Rusiyene barışıq muzakereler içün zararlı" dep yazdı.
Bu aqta Tramp öz Truth Social içtimaiy ağında yazdı.
Trampnıñ aytqanına köre, "Qırım çoq yıl evelsi Barak Obama prezidentligi vaqtında ğayıp etilgen edi ve şimdi muzakere etilmey bile".
Onıñ fikirince, "Zelenskıynıñ bu kibi izaatları cenkniñ çezilüvini qıyınlaştıra".
"Kimse Zelenskıyden Qırımnı Rusiye Federatsiyasınıñ territoriyası olaraq tanımasını istemey, amma o, Qırımnı istese, ne içün onıñ içün 11 yıl evelsi cenkleşmediler? onı bir kere de ateş açmayıp Rusiyege teslim ettiler", — dep yazdı Trump.
Bir kün evel Ukrayina prezidenti Volodımır Zelenskıy Kıyivde jurnalistlerniñ suallerine cevap berip, Ukrayina Qırım Muhtar Cumhuriyetiniñ işğaline uquqiy şekilde razı olmaycağını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
