AQŞ prezidenti Donald Tramp (Donald Trump) noyabrniñ 30-ında, Keriç boğazında ukrain arbiyler ve gemilerniñ Rusiye tarafından zapt etüvini tefsir etti.
Tramp, Rusiye ve Ukraina Qara deñizde yüz bergen vaqiağa bağlı meseleni yaqın vaqıtta çezecegine ümütini bildirdi.
Yapon baş naziri Sindzo Abenen (Shinzō Abe) körüşüv vaqtında jurnalistlerniñ suallerine cevap berip, Tramp, G20 sammitinde Vladimir Putinnen körüşüvniñ lâğu etilmesiniñ yekâne sebebi - noyabrniñ 25-inde Rusiyeniñ Qara deñizde Ukrainağa qarşı tecavuzı dep ayttı.
“Biz olğan şeyni begenmeymiz. Biz bundan memnün degilmiz, kimse memnün degil. Amma, ümüt etem ki, olar yaqında bu meseleni çezip olur, çünki biz prezident Putinnen körüşüvni sabırsızlıqnen bekleymiz. Amma, gemiler ve deñizcilerge qarşı yapılğan areketler (körüşüv lâğu etilmesine) yekâne sebep oldı”, - dep qayd etti Tramp.
Noyabrniñ 30-ında Argentina paytahtı Buenos-Ayreste keçken G20 sammitiniñ başında Tramp ve Putin biri-birini selânlamadı.
Noyabr 29-ında AQŞ prezidenti Donald Tramp, Keriç boğazında FSB tarafından zapt etilgen ukrain gemiler ve deñizcilerni Ukrainağa qaytarmağanı içünRusiye prezidenti Vladimir Putinnen körüşüvini lâğü etkenini öz Twitterinde bildirdi .
Bir kün evel AQŞ prezidenti Donald Tramp, Keriç boğazındaki “tecavuz” sebebinden Rusiye prezidenti Vladimir Putinnen Argentinada G-20 sammitinde körüşüvni lâğu ete bilecegi aqqında ihtar etti. Haber etile edi ki, Tramp, cuma ve cumaertesi künleri Buenos-Ayreste keçecek G-20 sammitinde Putinnen körüşecek edi. Bu körüşüvde Tramp, mudafaa, silâ nezareti ve Yaqın Şarq ve Ukraina meselelerini muzakere etecek edi.
G7 devletleriniñ vekilleri, Rusiyeniñ Keriç boğazındaki areketlerinitenqit etti ve zapt etilgen ukrain deñizcileri ve gemilerni azat etmege çağırtı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Kreml nezareti altındaki Aqmescitniñ Kiyev rayon mahkemesi, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini 2019 senesi yanvarniñ 25-ne qadar tevqif etti. Keriç hastahanesinde yaqtqan daa üç deñizcini Keriç şeer mahkemesi tevfiq etti. Olar da 2018 senesi yanvar 25-ine qadar apiste bulunacaq. Ukraina askerleri 6 yılğa azatlıqtan marum qala bile.
QMC prokuraturası FSB tutqan ukrain deñizcilerini cenk esiri dep saya.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve AQŞ tenqit eteler.NATO, vaziyetniñ ilerlevüne diqqatnen közetkenilerini ve kerginleşkenine yol bermemek içün tedbirler azırlaycağında işandırdı.
