Qırımnıñ Rusiye akimiyeti Qırımdaki Rusiye FSBsi ve Rusiye İç işler nazirliginiñ idaresinen beraber cep telefonları vastasınen izolâtsiyada olğanlarnı kontrol etecek.
Bu aqta Qırımnıñ Rusiye yolbaşçısı Sergey Aksenov Qırımda koronavirus yuqunçınıñ tarqaluvına qarşı operativ ştab toplaşuvında ayttı.
«FSB ve İç işler nazirligi zenaatdaşlarımız sağ olsun, izolâtsiyada olğanlar üzerindeki kontrolni billing, telefon vastasınen kerçekleştirmege añlaştıq. Sankt-Peterburgda, Kalmıkiyada zenaatdaşlarımız endi çalışa. Zemaneviy tehnik vastaları evge barmayıp, hadimlerge kontrol etmege imkân bere. İç işler nazirligine doğru bağda olmağa acet qalmaycaqtır», – dedi Aksenov.
Onıñ qayd etkenine köre, evde özüni izolâtsiya etkenlerniñ elektron bazası endi azır.
«Tehnik vastalar, uquq qoruyıcılarımıznıñ yardımınen şeerlerni dolaşmaycaqlarnı kontrol eteyik», – dep qayd etti Aksenov.
Aprelniñ 12-si sabasına qadar Qırımda 31 koronavirus hastası qayd etildi. 2973 insan közetüv altında buluna. Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
