Ukraina prezidenti namzeti, şoumen Volodımır Zelenskıy, Rusiye prezidenti Vladimir Putinnen muzakereler keçirmege azır, amma Ukraina topraqlarından vazgeçüv ihtimalı olmamalı bile. Bu aqta Azatlıq Radiosınıñ ukreain hızmeti bildirmekte.
“Topraq ve adamlarnı biz iç bir vaqıt feda etmeycekmiz. Ukraina butünligi daimiy olmalı. Bu sadece Ukraina Anayasasında degil de, er aqıllı adamnıñ, er Ukraina vatandaşınıñ yüregindedir”, - dedi aprelniñ 7-sinde Zelenskıy “Ukraina” televizion kanalına intervyü bererek.
O qoştı ki, Ukraina şarqında cenk toqtatılması aqqında Rusiyenen Ğarp vastası ile añlaşmaq kerek.
“Minsk protsesini devam etmek kerek. Amma... bu Minsk formatını reforma etmek kerek”, - dedi o.
Ukraina prezidenti saylavlarınıñ ekinci turı aprelniñ 21-nde olmalı. Qanunğa köre, bunıñ ögüne namzetlerniñ munaqaşası Cemaat televideniyesinde keçirilmeli.
Martnıñ 31-nde Ukraina prezidenti saylavlarınıñ birinci turı keçirildi. Merkeziy saylav komissiyası saylayıcılarnıñ reylerini saydı: oyuncı ve iş adamı Volodımır Zelenskıy ve şimdiki prezident Petro Poroşenko ekinci turğa keçeler.
