Verem hastalığı olğan «qırımlı musulmanlar davasınıñ» mabüsi Tofik Abdulgaziyevniñ alı birden fenalaştı – ekimler ahlat sisteması zarar körgenini tasdıqladı, köküs içindeki limfa tüyüm yanğıları çürüp başladı. Bu aqta aqayınıñ tibbiy vesiqalarını alğan ömür arqadaşı Aliye Abdulgaziyeva bildirdi.
«Mütehassısqa muracaat ettim, verem sebebinden ahlat tüyümleriniñ yanğıları çürüp başlağanını añlattı. Bu hastalıq ağır keçe. Siyrek olğan bir şey. Abdulgaziyevniñ tutuluv şaraitlerine baqsaq, ölecek edi», – dep yaza yapayı.
Onıñ aytqanına köre, soñki 11 ay devamında aqayı er kün küçlü ilâclar ala, olar qaracigerine menfiy tesir ete bile.
«Yaqında aqayım semirdi, yahşı laf etip başladı ve atta şaqa yapıp başladı dep quvandım, amma çoq sürmedi. Şimdiki alı beklengen bir şey olsa da – şimdi bulunğan şaraitlerde qalması mümkün degil. Keçmegen dımlılıq, olmağan aş, er künlik monitoring ve daa çoq şey ayta bilem, amma ne fayda», – dep aytıla haberde.
Tofik Abdulgaziyev apiske alınmazdan evel Qırım siyasiy mabüsleriniñ balaları içün tedbirlerniñ teşkil etilmesinde iştirak ete edi. «Qırım birdemligi» cemaat birleşmesiniñ faali, ses operatorı, «Qırım balalığı» leyhasınıñ iştirakçisi edi.
Bundan ğayrı, siyasiy mabüslerge SİZO-ğa aşayt mallarını berüvnen oğraşa, siyasiy sebeplernen bağlı davalar boyunca mahkemelerge bara, evlerinde tintüv keçirilgen semetdeşlerge qol tutmağa kele edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faaltutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
2022 senesi mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
2023 senesi iyül ayında Tofik Abdulgaziyev Rusiye Federatsiyasınıñ Çelâbinsk vilâyetiniñ Verhneuralsk apishanesine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
