Aqmescitteki ekinci «qırımlı musulmanlar davasınıñ» mabüsi Tofik Abdulgaziyev Çelâbinskteki verem hastahanesine kritik alda avuştırıldı, dep haber ete «Suspilne».
Advokat Emil Kurbedinov neşirge izaat berip, Abdulgaziyevniñ diagnozı aytılmay, amma «pek ağır» olğanı belli, dep bildirdi.
«Bu künleri reanimatsiyadan çıqarıp, bölükke alğanlarını bilem. Alı kritik degildir, dep tüşünem, amma sağlığı ve beden alı pek ağır. Ağır hastalığı bar, şimdilik aydınlatmaymız, amma reanimatsiyadan endi çıqarğanlar. Şimdi anda soy-sopları buluna. Olar onı körmege tırışmaq içün Çelâbinsk vilâyetine barmağa mecbur oldı», – dep qayd etti o.
Martnıñ 22-nde «Qırım birdemligi» aq qorçalayıcı teşkilâtı «Qırım musulmanları davasınıñ» mabüsi Tofik Abdulgaziyevni Rusiyeniñ Verhneuralsk apishanesinden Çelâbinskteki tuberkulöz hastahanesine ketirdiler, dep bildirgen edi. Qayd etilgenine köre, qırımlınıñ al kritik, Cezalarnı yerine ketirüv federal hızmetiniñ hadimleri ve apishane hastahanesi soy-soplarına telefonda tafsilâtlı malümat bermedi.
Tofik Abdulgaziyev apiske alınmazdan evel Qırım siyasiy mabüsleriniñ balaları içün tedbirlerniñ teşkil etilmesinde iştirak ete edi. «Qırım birdemligi» cemaat birleşmesiniñ faali, ses operatorı, «Qırım balalığı» leyhasınıñ iştirakçisi edi.
Bundan ğayrı, siyasiy mabüslerge SİZO-ğa aşayt mallarını berüvnen oğraşa, siyasiy sebeplernen bağlı davalar boyunca mahkemelerge bara, evlerinde tintüv keçirilgen semetdeşlerge qol tutmağa kele edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
2022 senesi mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
2023 senesi iyül ayında Tofik Abdulgaziyev Rusiye Federatsiyasınıñ Çelâbinsk vilâyetiniñ Verhneuralsk apishanesine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
