Rusiye mahkemesi 12 yılğa üküm etken qırımlı faal, ekinci Aqmescit "Qırımlı musulmanlar davasınıñ" mabüsi Tofik Abdulgaziyev Rusiyeniñ Çelâbinsk koloniyasından sağlıq vaziyeti sebebinden azat etildi. O, işğal etilgen Qırımğa qayttı ve qorantasınıñ yanında buluna. Bu aqta Qırımtatar Milliy Meclisiniñ reisi Refat Çubarov Facebook saifesinde bildire.
Çubarovnıñ aytqanına köre, Abdulgaziyev oktâbrniñ 26-nda azat etildi, lâkin yarımadağa qaytqanına qadar bu malümatnı aydınlatmamağa qarar berilgen edi.
"Azat etilgenini bilgen er kes Tofik onı uzaq Rusiye Çelâbinskinde koloniya yanında qarşılağanlarnen beraber evge, Qırımğa, qaytqanına qadar bunı aydınlatmamağa qarar berdi. Şimdi Tofik yaqınlarınıñ yanında buluna", – dep yazdı Çubarov.
Onıñ qayd etkenine köre, apiste Abdulgaziyevniñ ağır hastalıqları başladı, şu cümleden apiste qalmasına mania olğan onkologik hastalıq.
Onıñ malümatına köre, daa 2026 senesi fevralniñ 26-nda tibbiy komissiya Abdulgaziyevniñ apiste qalmasına mania olğan hastalığı olğanını qayd etti. O künü vesiqalar mahkemege berildi, amma siyasiy mabüs azat etilmek yerine tekrar tibbiy teşkerüvge yollanıldı.
İyulniñ 29-nda ekimler komissiyası Abdulgaziyevniñ alı apiste qalmasına izin bermey, dep tasdıqladı.
"Böylece, suniy tellerniñ sekiz ayı keçti. Aq qorçalayıcılar Rusiye akimiyeti Abdulgaziyevni ölüm telükesine oğratqan dayanılmaycaq şaraitler yaptı, dep ayta", – dedi Çubarov.
Onıñ aytqanına köre, Qırımlınıñ azat etilüvini sozuv sağlığına nasıl tesir etti şimdilik belli degil, çünki bu vaqıt devamında o, kerekli tibbiy yardım ala bilir edi.
Çubarovnıñ haber etkenine köre, oña berilgen malümatqa köre, Abdulgaziyev Qırımğa qaytqan soñ yaşağan yerini terk etmeycek.
"Eñ müim şimdi – Tofik Abdulgaziyevniñ Qırımda kerekli tibbiy yardım ala bilmesi, ayatı ve sağlığınıñ ise qurtarılması", – dep qayd etti Qırımtatar Milliy Meclisiniñ reisi.
Hatırlatamız, Tofik Abdulgaziyev 2019 senesi Sabannıñ 27-nde işğal etilgen Qırımda Rusiye Federatsiyasında yasaqlanğan, amma dünyanıñ diger memleketlerinde izin berilgen "Hizb ut-Tahrir" diniy teşkilâtında iştirak etkeninde qabaatlanıp tutuldı.
2022 senesi Quralayda Rostov-na-Donu Cenübiy okrugınıñ arbiy mahkemesi Abdulgaziyevni 12 yıl sert rejimli koloniyada qalmasına üküm etti. İlk beş yılını apishanede keçirmek kerek. Bir yıl soñra, 2023 senesi Quralayda, Vlasiha şeerindeki İstinaf arbiy mahkemesi birinci instantsiya mahkemesiniñ qararını deñiştirmedi.
2023 senesi Oraqta Tofik Abdulgaziyev Rusiye Federatsiyasınıñ Çelâbinsk vilâyetindeki Verhneuralsk apishanesine etap etildi.