Rusiyede "Qırım musulmanları davası" boyunca 15 yıl apis cezasına mahküm etilgen qırımlı Ruslan Zeytullayevni Salavat koloniyasında (Başkortostan) ömür arqadaşı Meryem Zeytullayeva ziyaret etti. Bu aqta "Qırım birdemligi" cemaat birleşmesi haber ete.
Ruslan ile körüşmek içün Meryem 2,5 biñ kilometr yolnı keçken. Devamlı körüşüvge, o, retsepti kerek olmağan ilâclarnı ketirgen, amma aqayına olarnı bermesine izin bermegenler.
"Ariza yazmaq istedim. Amma olar bunı o yapmaq kerek dediler ve ilâclarnı almadılar. Ve men olarnen evge qayttım", - dep aytıp berdi Meryem.
Onıñ sözlerine köre, Ruslannıñ tişleri ağıra eken.
"Suvuq avada, Salavatta ise bu sıfırdan aşağı 35 derece, tışarığa çıqqanda yanğı protsessi başlana, tiş siñirleri açıla ve bundan sebep çengesi ve tişleri ağırıp başlay", - dep añlattı o.
Bundan ğayrı siyasiy mabüsniñ bedeninde bellisiz tökme peyda olağan.
"Tökme bütün bedenine darqala. Yara merkezi quruy ve soñra tökme başqa yerge keçe", - dedi o.
Ruslan Zeytullayev Rusiye mahkemesi tarafından «Hizb ut-Tahrir» teşkilâtınıñ bölügini qurğanında qabaatlanğan edi.
2017 senesi iyül ayında Rusiye Yuqarı mahkemesi Zeytullayevniñ apis cezasını 15 yılğa qadar arttırdı. Buña cevap olaraq aqyarlı açlıq ilân etken edi.
Ukraina Tış işler nazirligi Rusiye Yuqarı mahkemesiniñ apis cezasını arttırmaq qararına qarşı narazılıq bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
