Dekabrniñ 13-nde saba Rusiye uquq qoruyıcıları İslâm Terek rayonınıñ Cuma Eli (Privetnoye) köyünde imam İsmail Yurdamovnıñ evini tintti. «Qırım birdemligi» bildirgenine köre, erkek tutuldı ve polis bölügine alıp ketirildi.
«Saba, altığa on qalğanda evde tintüv başladı. Bir saata soñ bitti, kamuflâjlı insanlar onı Gazelge mindirip, köy camisine alıp ketti. Camini de tintip, er şeyni baqqanlar. Soñra başqa maşinağa mindirip, İslâm Terekke doğru ketkenler. Şimdi qaydalar – soy-sopları bilmey», – dep bildirdi cemaat imayecisi Mustafa Seydaliyev.
İmamnıñ qızı Gülsum Yurdamovanıñ aytqanına köre, uquq qoruyıcılar tintüv sebebini aytmadı, bütün qorantanıñ cep telefonlarını aldı. Tutulğannıñ ömür arqadaşı qanser hastası ola, dep haber etile.
«Qapu qaqıp, polis olğanlarını aytqanları. Kiyinmege vaqıt berip kirgenler. Bir şey añlatmadılar, suallerge «tezden kelip anlatırlar» dep cevap berdiler. Amma kimse kelmedi... Maddeni soradım bir şey aytmadılar. Şaatlardan kim olğanlarını soradım, onı da aytmadılar, oqumağa bir şey bermediler. Babamnı alıp, «İslâm Terekke camige ketecekmiz» dep aytqanlar. Eki şaat ve eki adiy urbada insan, bir rutbeleri bardır. Urbalı, silâlı, betleri qapalı, bir beş kişidir», – dedi o.
«Qırım birdemligi» bildirgenine köre, saat 9:00-da Yurdamov İslâm Terek rayonındaki Rusiye polis bölügine ketirildi.
Kündüz Yurdamov polis bölüginden yiberildi. Berilgen malümatqa köre, oña qarşı «qanunsız missionerlik faaliyeti» sebebinden memuriy protokol tizildi.
Ukrayına prezidentiniñ Qırım Muhtar Cumhuriyetindeki temsilciligi bildirgenine köre, dekabr ayına qadar Qırımda qanunsız tutulğan 191 kişi aqqında malümat bar. 123-ü qırımtatarıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
