Rusiye mahkemesi tarafından «qırımlı musulmanlar davası» boyunca 17 yılğa azatlıqtan marum etilgen qırımlı vatandaş jurnalisti Timur İbragimov köz implantınıñ deñişmesine ihtiyacı bar, amma apishane hastahanesinde böyle ameliyat yapmağa imkân yoq.
Bu aqta «Qırım birdemligi» cemaat birleşmesine qırımlı vatandaş jurnalistiniñ ömür arqadaşı Dilâra İbragimova bildirdi.
«Şimdilik deñiştirüv variantları yoq, çünki bu koloniya. Bu şaraitlerde nasıl bir yardım kösterecekler belli degid. Şunıñ içün böyle qala. Koloniyadaki köz ekimi baqtı, ilâc, tamçı ve vitamin yazdı», – dep tarif etti İbragimova.
Köz sebebinden üçünci derece saqatı olğan İbragimov közlerinden şikâyet etti. Bir közü 15 yıl evelsi suniy közge deñiştirilgen edi.
2017 senesi oktâbr ayında Rusiye uquq qoruyıcıları altı Bağçasaray sakinini tututı. Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov.
Rusiye FSBsi olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkenlerinde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahmekesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
