Rusiyede mahküm etilgen qırımlı vatandaş jurnalisti Timur İbragimov sağlıq şikâyetleri yoq, amma közleri zayıf körip başladı. Bu aqta aqayını Râzan vilâyetindeki koloniyada ziyaret etken ömür arqadaşı Dilâra İbragimova tarif etti.
«Qırım birdemligi» cemaat birleşmesi bildirgenine köre, İbragimov balalığından 3 derece körüv saqatı ola.
«Dilâra aqayınıñ sağlıq alını bir qarar dep saya, amma şaraitler sebebinden körüvi zayıflaşa, köz tamçısına muhtac, dep qayd etti. Koloniyada bir de bir tibbiy yardım aqqında aytılmay, dedi apayı. Timurnıñ memuriyetnen munasebeti yahşı – bir zıddiyet yoq, işke daa almadılar. Aş aynı, bazı vaqıtları domuz eti berip, diniy baqışları sebebinden onı aşamay», – dep aytıla haberde.
Timur İbragimov ve daa beş qırımtatarı 2017 senesi oktâbrniñ 11-nde Rusiye uquq qoruyıcıları tarafından tutuldı. Olarnı Rusiyede yasaqlanğan, amma Ukrayınada qanunğa uyğun areket etken «Hizb ut-Tahrir» teşkilâtında iştirak etkeninde qabaatladılar.
2020 senesi sentâbrniñ 16-nda Rusiye mahkemesi Timur İbragimovnı 17 yılğa azatlıqtan marum etti.
«Memorial» aq qorçalayıcı merkezi Bağçasaraydaki ekinci «Hizb ut-Tahrir davasınıñ» mabüslerini siyasiy mabüs tanıp, acele azat etilmelerini talap etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
