Vladimir Bukovskiyniñ vefatı aqqında resmiy haberni bizler, I ve II Qırım forumlarınıñ iştirakçileri, yazmamalımız. Fikirlerimizde başqa sözler peyda ola, başqa, kederli, nota yanğıramaqta. Sahte resmiylikni sevmegen dostumız vefat etti. Bugün onı adiy yürek tilinen añacaqmız.
Vladimir Bukovskiy ayatımızğa küreşçi olaraq kirdi, onıñ adı aq qorçalayıcı areketiniñ timsali oldı. Narazılıq aktsiyalarını teşkil etüv, cemaat teşkilâtlarını quruv, dört apis cezası, psihiatrik hastahanede bir qaç kere tutulması ve, niayet, Bukovskiyniñ Çili kommunist lideri Luis Corvalánğa almaştırıluvı, 1976 senesi dekabr ayında bütün dünya bunı laf etken edi, – bular onıñ qaynağan dissident tercimeialınıñ tek qısqa mündericesidir.
Vladimir Bukovskiy ayatımızğa küreşçi olaraq kirdi, onıñ adı aq qorçalayıcı areketiniñ timsali oldı
O, etik mili bütün diger motivatsiyalarnıñ saibi olğan ananeviy Rusiye dissidentligini temsil etken edi. Şu sebepten bu ananege bütün diger milliy dissident areketleri esaslanğan edi, Vladimir onıñ esas qıymetlerini ögge sürgen edi: azatlıq, itibar, er bir insannıñ vatandaş, medeniyet ve din aqları. Vladimir bizge tanış olğan bir çoq Rusiye dissidentinden tek energiyası ve israrlığınen, nizamı ve printsipialliginen degil, dünya qadar adalet duyğusınen, asırlar devamında Rusiyeniñ imperiya basqısı altında bulunğan büyük ve küçük halqlarğa nisbeten duyğudaşlığınen ayırılğan edi. Bunı o, qırımtatar halqına köstergen birdemliginen isbatlağan edi, onı ise 2012 senesi Aqmescitte I Qırım forumında ve 2014 senesi Kyivde qırımtatar sürgünliginiñ 70 yılına bağışlanğan matem tedbirlerinde iştirak etip kösterdi.
Vladimir Bukovskiy azatlıq ğayesinen yaşap, er angi zorbalıqtan nefret etken edi
Bizge duyğudaşlıq köstergen ve yardım etken, amma halqlarnıñ mustaqillik istegini añlamağan ve is etip olamağan bir çoq diger Rusiye dissidentinden farqlı olıp, Vladimir Bukovskiy azatlıq ğayesinen yaşağan edi. O, er angi zorbalıqtan nefret etip, kommunistlerniñ idaresi altında halqlarnıñ demokratizatsiyasına ve imperiyağa qarşı esnaslar olacağına, imperiya qalımtılarında ise yañı devletler qurulacağına inanğan edi.
O, melek degil edi, nefret etmege bile edi, öz hatalarına baqıp ögrengen cesür insan areketleri ve coşqunlığınen yaşağan edi
Vladimir, 30 yıl devamında sovet qurumına qarşı qararlı olıp, ondan çoq yaşadı. Amma, ne yazıq ki, bu rejim takbih etilecek, Rusiye imperiya degil de, demokratik memleket olacaq vaqıtlarnı körmedi. Bunıñ içün Rusiye milliy katarsisiniñ merkezi olacaq ve, inanamız ki, Vladimir Bukovskiyden örnek alacaq yañı boysunmaycaq küreşçiler kerektir. Bu katarsisniñ ilk örnegini ise soñki fotoresimlerinden birinde körmek mümkün, Vladimir ögünde masada öz elinen yapqan Ukraina ve qırımtatar bayraqları şişege qoyulıp tura.
O, melek degil edi, nefret etmege bile edi, öz hatalarına baqıp ögrengen, amma Tañrıdan ve ana-babasından alğan energiyasınen faaliyetini devam ettirgen cesür insan areketleri ve coşqunlığınen yaşağan edi. Mihail Bulgakovnıñ «Master ve Margarita» romanında Leviy Matveyniñ Master aqqında Volandqa aytqanı kibi: «O, nurğa degil, raatlıqqa lâyıq».
O qadar accını körgen, amma insanlarğa o qadar da yahşılıq bağışlağan canı raat olsun!
Hatırası ebediy olsun!
Mustafa Cemilev, dissident, Ukraina halq deputatı, qırımtatar halqınıñ lideri
İosif Zisels, dissident, Ukraina Helsinki insan aqları birliginiñ közetüv şura azası, Ukrainanıñ yeudiy teşkilâtları ve cemiyetleri birliginiñ yolbaşçısı
Tatyana Bonner-Yankeleviç, aq qorçalayıcı (ABD)
Mıroslav Marınovıç, Ukraina Helsinki gruppasınıñ qurucı azası, Ukraina katolik universitetiniñ rektor muavini
Aleksandr Podrabinek, aq qorçalayıcı (Rusiye)
Malümat: Sovet dissidenti, aq qorçalayıcı ve yazıcı Vladimir Bukovskiy 77 yaşında oktâbrniñ 28-nde Büyük Britaniyada vefat etti. Bukovskiy noyabrniñ 19-nda Londradaki Highgate mezarlığında defin etilecek.