Tifliste Gürcistan parlamenti «çetel agentleri» qanun leyhasından birini birinci muzakerede qabul etken soñ başlağan narazılıq aktsiyası vaqtında 66 kişi tutuldı, dep bildire Gürcistan İç işler nazirligi.
Aktsiya iştirakçileri poliske tirengeni ve ciddiy olmağan çapqınlıq sebebinden yaqalandı.
İç işler nazirligi «zorbalıq adiselerinen» bağlı tahqiqat başlattı – «Polis hadimine ücüm» ve «Mülkke zarar ketirüv ve yoq etüv» maddelerine istinaden.
Müessise polis hadimleri Tiflis merkezine «cemaat nizamını qorumaq ve narazılıq aktsiyasınıñ barışıq şekilde keçmesini temin etmek» içün keldi, dep bildirdi. Lâkin soñra «narazılıq söz serbestligi ve barışıq toplaşuvları qanunı tışına çıqıp, zorbalıq alına kelgen eken».
Gürcistan İç işler nazirligi qayd etkenine köre, narazılıq bildirgenler parlament kirişini blok etmege tırışıp, polis hadimlerine taş, tez yanğan maddeler, eşyalar attı, küç qullandı.
«Cemaat nizamını ğayrıdan tiklemek ve uquq bozuvlarına mania olmaq içün polis küç qullanıp, mahsus tenbi vastalarını qullanmağa mecbur oldı», – dep bildire Gürcistan nazirligi. Onıñ malümatına köre, Gürcistan İç işler nazirliginiñ 50 hadimi zarar kördi.
«Çetel agentleri» qanun leyhalarından biri olğan «Çetel tesiriniñ şeffaflığı» qanun leyhası Gürcistan parlamentinde baqıla. Ekinci variantına martnıñ 9-nda rey berilecek.
Martnıñ 7-nde aqşam parlament binası ögünde beş biñden on biñge qadar insan toplaştı. Narazılıq bildirgenler polisnen çatıştı, neticede uquq qoruyıcılar köz yaşlatqan gaz ve suv qullandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
