İyünniñ 21-ne keçer gecesi Tifliste parlament binasınıñ yanında büyük narazılıq aktsiyaları keçti. Tünevin aqşam on biñge yaqın insan Gürcistan parlamentiniñ binası ögünde mitingge toplaştı.
Rusiye Devlet dumasınıñ deputatı Sergey Gavrilov Tifliste keçirilgen Parlamentlerara pravoslavlıq assambleyasınıñ sessiyasını Gürcistan parlamentiniñ spikeri yerinde oturıp açqan soñ narazılıqlar başladı. Deputatlar buña açuvlanğan edi.
Toplanğanlar parlament reisi ve Gürcistan İç İşler naziriniñ istifağa çıqqanını talap etti. Polis narazılıq iştirakçilerine qarşı bir qaç sefer köz yaşlatıcı gaz, suvatıcı ve rezina qurşunlarnı qullandı.Şimdi resmiy ziyaret ile Belarusta olğan Gürcistan prezidenti Salome Zurabishvili, aktsiya vaqtında zorbalıq qullanılğanını tenqit etti.
Gürcistan sağlıq nazirligi, Tifliste narazılıq bildirgenler ve politsiya hadimleri arasında yüz bergen çatışmalarda 240 insan yaralandı. Olarnıñ arasında 80 politsiya hadimi olğanını, bildirdi.
