The Washington Post Amerika neşri Rusiye mahkemesi tarafından 5 yılğa azatlıqtan marum etilgen Qırım.Aqiqat frilanserı Vladislav Yesipenkonı acele azat etmege çağırdı. Mütenasip beyanat "Matbuat serbestligi içün ortaqlıq" teşebbüsiniñ saifesinde yerleştirildi.
Qayd etilgenine köre, jurnalistni pek yaramay şaraitte tutalar. Bundan da ğayrı, Yesipenko üç yıldan berli qorantasını körmedi.
"Jurnalist Vladislav Yesipenko Rusiye agentleri tarafından tutulıp, beş yıllıq apis cezasını çeke, o, yaramay şaraitte tutula ve sağlığını saqlamaq içün küreşe. Vladanıñ deral azat etilmesini talap etemiz", — dep aytıla beyanatta.
Vladislav Yesipenko ukraнin jurnalisti, Qırım.Aqiqatnıñ frilanseridir. Apiske alınmazdan evel içtimaiy ve ekologik meselelerni aydınlattı, qırımlılarnen soravlar keçirdi.
2021 senesi martnıñ 10-nda onı Aqmescitte tuttılar. Rusiye akimiyeti jurnalistni "Ukryaina mahsus hızmetleri içün" malümat toplağanında ve maşnasında "öz başına yapılğan patlayıcı cihaz" saqlağanında qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.