Ukrayinanıñ Rusiye Federatsiyasınıñ Qara deñiz flotunı yoq etmesi ve işğal etilgen Qırımda Rusiye ava mudafaasınıñ tezleştirilgen demontajı yarımadadaki Rusiye ordularını mudafaağa keçmege mecbur etti, dep yaza britaniya The Telegraph neşiri.
"Qırımnı qaytarmaq maqsadınen yapılğan adiy ücüm kibi körünse de, Donbas ve Kursknı quvetleştirmek içün Rusiye ordusınıñ köçürilüvi yarımadada Ukrayinanıñ gizli ameliyatlarını quvetleştirmek içün yol aça bile", — dep aytıla haberde.
Ukrayina Silâlı quvetleriniñ Kursk operatsiyasına baqmadan, Donbasta Rusiye quvetleriniñ çekilüvi alâmetleri yoq, lâkin bir qaç faktor Moskvanıñ Ukrayina şarqında ücümni devam ettirmek qararını boza bile.
Birinciden, eger de Ukrayina Kursk vilâyetinde muvafaqiyetlerge irişse, Rusiyeniñ işğal etilgen topraqlardan daa çoq küçüni çıqarması kerek ola bile, bu ise olarnıñ mudafaa noqtalarını zayıflata bile, bu ise ukrayin uçaqlarınıñ darbeleriniñ sıñırını kenişlete bile, bu ise Rusiyeniñ uzaq mesafelerge ücüm etmek imkânlarını daa da zayıflata bile.
"Ekinciden, şimdi azırlıq körgen ukrayin brigadaları, Rusiye ordusı zayıflıq köstergen yerlerge köre, ya Kursk vilâyetini, ya da Donetsk vilâyetini quvetleştirmek içün qullanıla bile. Bu çeviklik Kıyivge 2025 senesi qarşı ücüm etmege imkân bere bile" — dep yaza Telegraph.
Kursk operatsiyasınıñ muvafaqiyeti Rusiye ordularınıñ keri çekilmesinen bağlı olmay bile, amma eger de o, Moskvanı qıyın vaziyetke oğratmağa ve logistika yollarını bozmağa devam etse, Rusiye orduları cevap bermege mecbur olacaq, bu ise, neticede, Donbastaki ameliyatını bozacaq. Lâkin bu tez bir zamanda olmaycaq, ve Ukrayinağa cenübiy-şarqiy cebe quvetleştirüvi kerek ola bile.
Avgustnıñ 6-nda Ukrayina Rusiyeniñ Kursk vilâyetinde apansızdan ücümge başladı. Ukrayina Silâlı quvetleri onlarnen meskün yerni, şu cümleden Suca rayon merkeziniñ nezareti altında olğanını bildire. Rusiye akimiyeti bu malümatnı red ete ya da izaatlamay. Lâkin Kursk vilâyetinde federal miqyaslı fevqulâde vaziyet rejimi ilân etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
