The New York Times neşri yüksek rutbeli ukrayin memurına atfı etip, işğal etilgen Qırımnıñ Canköy civarındaki patlavlarğa "elit ukrayin bölüginiñ" alâqası bar, dep bildirdi. Neşirniñ qayd etkenine köre, memur adı gizli olğanını istegen.
Evel haber etilgeni kibi, Rusiye Mudafaa nazirligi Qırımnıñ şimalinde yüz bergen adiselerge "diversiya" dedi. Qırımda bu sebepten cinayet davası açılğan.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlarlarnı "terror eylemleri" adlandırdı.
Avgustnıñ 16-sında saba saatlarında işğal etilgen Qırımnıñ Canköy rayonında patlav sesleri eşitilgen. Yerli telegram kanalları Canköy rayonıñ Haklay köyünde elektrik stantsiyası yanğanını haber ettiler. Aynı zamanda "Krımskiy Veter" telegram kanalı "anda arbiy yedekler anbarından detonatsiya" olğanını bildire. Arbiy yedekler anbarından patlavlar aqqında malümatnı Qırımtatar Milliy Meclis reisi Refat Çubarov tasdıqladı.
Bundan ğayrı avgustnıñ 16-sında işğal etilgen Qırımnıñ Aqmescit rayonındaki Sarabuz qasabasında Rusiye arbiy uçaq alalında da patlavlar yüz berdi.
Avgustnıñ 9-nda işğal etilgen Qırımnıñ Saq rayonındaki Novofedirivka qasabasında arbiy uçaq alanında bir qaç patlav yüz berdi. Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayina Mudafaa nazirligi Novofedirivka qasabasındaki Rusiye arbiy aerodromında patlavlarnı izaatlap, müessise «yanğın sebeplerini bilmey», dep qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
