Tevqif etilgen “Qırım birdemligi”teşebbüsiniñ koordinatorı Server Mustafayev, bazar künü, mayıs 5-inde 33 yaşını toldurdı. Bu, SİZOda qutlağan birinci doğğan künü. Bu aqta Qırım.Aqiqatqa onıñ anası, Venera Mustafayeva bildirdi.
Daa o, on bir ay devamında oğlunen tek bir körüşüv ruhseti berilgenini qoştı.
“Bütün vaqıt devamında biz Servernen tek bir kere bir saatqa körüştik. Ebet, biz onı körgenimizge pek quvandıq. O er şey aqqında sorap bile edi, biz laf ettik, laf ettik ve laf etip toymadıq. Ebet, o tezce azatlıqta, biznen beraber olsun dep isteymiz, çünki Server bizge pek kerek”, - dedi Venera Mustafayeva.
O, qorantasına bu vaqıtları destek etken adamlarğa da minnetdarlığını bildirdi: “ Balalar ne qadar büyük iş yapqanını, SİZOğa özümiz ilk sefer yollamanı alıp ketkende, añladıq. Ebet, bu - büyük emek ve qorantalar içün büyük yardım. Biz bu erte turmaqlarnı, nevbetlerni körmedik, ve, elbette, bu pek qıymetlidir”.
2018 senesi mayıs 21-inde Qırımda “Qırım birdemligi” koordinatorı Server Mustafayev ve qırımtatar, musulman Edem Smailov tutuldı.
Olarğa qarşı qabaatlavnı Bağçasaray “Hizb ut-Tahrir davası”na qoştılar.
