İlhaq etilgen Qırımda qanunsız tutulğan ağır hasta Edem Bekirov arqasında ağırılar sebebinden turıp olamay. Bu aqta Facebook saifesinde onıñ qızı Eleonora Bekirova haber etti.
“Acele şekilde oña ağırı kesici ilâclar yolladıq. Amma bu da meseleni çezmey. Bu pek ağır bir vaziyet ve bu alda kimden yardım soramağa bilmeyim”, – dep yazdı Bekirova.
Bekirov ayaqqa turıp olamağanı sebebinden, advokat Aleksey Ladin onı ziyaret etip olamadı.
Rusiye tarafı bunı iç bir şekilde izaatlamadı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye quvetçileri tarafından tutıldı. O, 78 anasını ve aqrabalarını ziyaret etmek içün Qırımğa kete edi.
Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
