NATO baş kâtibi Yens Stoltenberg, teslim olmaq barışıqqa irişmek demek degil, dep saya, şunıñ içün Şimaliy atlantik ittifaqı (NATO) Ukrayinağa qoltutmağa devam etmeli, dep bildirdi o, İttifaqnıñ ştab-kvartirasında İsveçiya bayrağını köterüv merasimi başlamazdan evel brifingde.
"Prezident Putinge cenk meydanında istegenini elde etmeycegini köstermek içün Ukrayinanı quvetleştirmege devam etmek kerekmiz", - dedi Stoltenberg.
O, Rusiye prezidenti Vladimir Putin bu cenkni başlattı ve onı bitire bile, amma Ukrayinanıñ böyle bir imkânı yoq, dep qoştı.
NATO baş kâtibiniñ fikrine köre, Rusiye prezidenti eki yıl evelsi büyük miqyaslı istilâğa başlağanda, qomşuları üzerinde daa çoq nezaret etmege istegen edi, amma bunı yapamadı. Stoltenberg qayd etti ki, bugün İttifaq daa büyük ve quvetli, Ukrayina ise "NATO azası olmağa daa yaqın degil".
Bir çoq memleket ve halqara teşkilâtlarnıñ liderleri, Roma Papası Frantsisk İsviçreniñ RSI teleradiokompaniyasına bergen intervyüsında Rusiye Federatsiyasınıñ Ukrayinağa qarşı cenk kontekstinde Ukrayinanı muzakerelerge çağırğanından ve "Aq bayraq"nı kötermek cesaretini köstergeninden soñ, Ukrayinağa qoltutqanlarını bildirdiler.
Hususan, Poloniya tış işler naziri Radoslav Sikorskiy Roma papasına "Rusiye prezidenti Vladimir Putinni Ukrayinadan ordularnı çıqarmağa çağırmağa" teklif etti ve böyle alda "barışuvlarsız barışıq" olacağını qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
