Ukrayina prezidenti Volodımır Zelenskıy Rusiyeniñ Harkivdeki soñki ücümine - ''terror adaletli cevapsız qalamaz'' dep cevap berdi.
O, dron ücümi neticesinde eki qoranta elâk olğanını hatırlattı.
''Aqiqat er vaqıt er angi sözden daa çoq ayta. Keçken gece Harkivde "Şahedler" ücüminden soñ yanğın neticesinde bütün qoranta elâk oldı: ana-baba ve üç bala. Büyük oğul Aleksey 7 yaşında, orta oğul Mihail 4 yaşında, küçük oğulu Pavel 7 aylıq edi. Rusiye deliligi sebebinden yaşamağa etiştirmegen ve öldürilgen balalar. Daa bir qoranta elâk oldı: aqay ve apay", - dep yazdı o, ve qoştı ki, Harkivde qurtaruv ameliyatı devam ete.
Zelenskıy, Ukrayinanı Rusiye istilâsından qorçalamaq içün qoltutqan er keske teşekkürler bildirdi.
''Er bir destek kösterüvi pek müimdir. Aynı zamanda terrorizmniñ cezasız qalmaycağını añlamaq müimdir. Terrorğa adaletli cevap berilmemek kerek. Terroristler başlağan bu cenkte yeñilmek kerekler. Rusiye, onıñ tarafından yoq etilgen er bir yaşayış içün cevap bermeli. Tek böyleliknen er kes içün telükesizlik kene kerçek olacaqtır", - dep qayd etti o.
Fevralniñ 10-na keçken gecesi Rusiyeniñ dron ücüminiñ neticesinde Harkivde bir qaç büyük yanğın çıqtı - 15 şahsiy ev yandı. Yerli akimiyetniñ malümatına köre, yedi insan elâk oldı. Baş prokuraturanıñ ofisiniñ malümatına köre, şahsiy evlerden birinde bütün qoranta elâk oldı: aqay, apay ve olarnıñ üç balası: 7 aylıq, 4 ve 7 yaşında oğlanlar. Diger evde 66 yaşında aqay ve 65 yaşında qadın elâk oldılar.
Ukrayina prezidenti Volodımır Zelenskıy yanvarniñ 30-nda bildirdi ki, yılnıñ başından berli Rusiye Ukrayinağa 330-dan ziyade çeşit raketa ve tahminen 600 arbiy uçucısız uçaqnı uçurdı.
Moskva, isbat ve şaatlıqlarğa baqmadan, tam cenk başlağanından berli Ukrayinada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
