Aqyarda dekabrniñ 28-nde «Uçkuyevka» parkı açıldı. Kimligi belli olmağan insanlar anda küçük mimarcılıq şekillerini bozdı, oturtılğan 30 ardıç çalısını ve daa 40 dane diger yeşil fidannı hırsızlağan edi. Bu aqta Qırım.Aqiqat mühbiri bildire.
Şeer sakinleriniñ bildirgenine köre, tış hızmetçi şirketi «parkta çoq terek kesti» ve yolaqlarda töşeme taş qoydı.
«Bu sebepten yazda parkta az kölge olacaq ve Qırım sıcağı is etilecek», – dep tüşüne park açılışına kelgen insanlardan biri.
Merasim musafirleriniñ aytqanına köre, parkta çoq şey peyda oldı: eglenceli şou içün yaz estradası, ticaret yerleri, büyük bala meydançığı ve digerleri.
Açılış alıp barıcıları, «Uçkuyevka» parkınıñ rekonstruktsiyası «Moskva ükümetiniñ imayesi altında» keçti, dep bildirdi.
«Yağmurğa baqmadan, Moskva ükümetindeki ortaqlarımıznıñ yardımınen Aqyarda yapılğan bu cemaat yerinden (Uçkuyevka parkından – QA) keyf almağa kelgeniñizge quvandım», – dep tarif etti Aqyar valisiniñ vazifelerini eda etken Mihail Razvojayev.
«Uçkuyevka» parkınıñ abadanlaştıruvı aqqında Aqyar akimiyeti 2019 senesi mayısta bildirgen edi. Parkta qoralar qoyuldı, keçiş sıñırlanıldı.
Yerli kütleviy haber vastalarınıñ malümatına köre, abadanlaştıruvdan soñ parkta yolcu ve ayaqmaşina yolaqları, pamp-trek ve skeyt-park, sport, bala ve baquv meydanları, yolcu, sanat obyektleri alanları, pavilyon, sundurmalar, park yeri ve ayaqyollar peyda olmalı.
Daa 2016 senesi Aqyar cemaatçıları «Uçkuyevka» parkına tabiat qorçalav yeri statusını bermege talap ettiler. Cemaatçılarnıñ fikirince, parknıñ hususiy statusı topraqnı biriniñ eline bermemege ve anda bir şey qurulmasına mania olmağa yardım etecek.
Daa soñra iş ketişatını kontrol etmek ve teklif kirsetmek içün Aqyar şeer hocalığınıñ departamenti yanında közetüv cemaat şurası qurulğan edi – bu organğa cemaatçılar, genç ve veteran teşkilâtlarınıñ vekilleri, Şimaliy taraf iş adamları birliginiñ temsilcileri, yerli faaller kirdi.
