Aqmescitniñ Sevastopolskaya soqağında işçiler yol işleri çerçivesinde tereklerni kese. Qırım.Aqiqat mühbiriniñ sentâbrniñ 14-ünde bildirgenine köre, yolnı «Krımmagistral» tamir ete.
İşçiler areketniñ eki yolağından da eski asfaltnı mahsus tehnikanen köterip çıqara.
Naqliyat eki tarafqa da eki yolaq yerine aynı yolaqtan keçmege mecbur. Şu sebepten, em Obyezdnaya soqağı qapatılğan içün, eki aftadan berli Sevastopolskaya soqağında büyük tıqanıqlıqlar peyda ola.
«Sevastopolskaya soqağınıñ bu tarafı kenişletilecek, qaldırımlar ise çetleştirilecek. Yol çetindeki terekler buña keder ete, şu sebepten olarnı keseler», – dep añlattı Qırım.Aqiqat mühbirine «Krımmagistral» vekili.
Sentâbrniñ 14-ne qadar Sevastopolskaya soqağınıñ «Qırım müendislik ve pedagogika universiteti» durağında yigirmige yaqın kestane, ceviz ve selbi teregi kesilip çıqarıldı.
Bundan evel Kreml kontrol etken Aqmescit memuriyeti Sevastopolskaya soqağınıñ bir qısmı tamir işlerinden sebep qapatılğanını haber etken edi.
Sentâbr ayınıñ başında Aqmescitniñ Kirov caddesine yaqın bir qaç soqaqta bir ay devamında bir taraflı areket yapmağa planlaştırıla edi.
Saba ve aqşam vaqıtlarında şeerniñ büyük soqaqlarında tıqanıqlıqlar peyda ola. Bundan ğayrı, Aqmescitniñ merkezinde yapılğan tamir işleri sebebinden yerli akimiyet cemaat naqliyatınıñ shema ve cedvellerini deñiştire.
