Tehniliy bozuqlıqlardan sebep iyülniñ 4-ünde saba Aqmescitniñ (Simferopol) bir qısmı yarıqsız qaldı, dep bildire "Krımenergo" müessisesinin matbuat hızmeti.
"Tehnikiy bozuqlıqtan sebep Aqmescitte bir talay qullanıcı elektrikasız qaldı. İyülniñ 4-ünde saat 6:45 Maryinoda elektrik stantsiyanıñ cihazları toqtap qalğan edi. Bundan soñ qoruv sisteması köçip, 13,44 MVt küçünde Aqmescit sakinleriniñ (76 460 adam) elektrik teminatını qısqa vaqıtqa toqtattı", - denile beyanatta.
Qayd etilgenine köre, 6:49-da elektrikler şeerniñ ğarbiy qısmına yarıq berdiler, 7:22-de elektrik teminat kene tamamınen berilmekte edi.
Daa evel çarşenbe künü, iyül 4-ünde Aqmescitte (Simferopol) bir qaç soqaq yarıqsız qalacaq, dep bildirilgen edi.
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik Qırım öz generatorları, Rusiye generatorları ve Kuban energoköprüniñ elektrik ağını qullana.
Martnıñ 18-inde Rusiye prezidenti Vladimir Putin Aqyarğa keldi, anda ise Balıqlava TES-iniñ açılışında iştirak etti.
