Rusiye kontrolindeki Qırım Yuqarı mahkemesinde yanvarniñ 14-nde «Tebliğ Cemaatı» din teşkilâtı bölüginiñ dava oturışuvında qabaatlanğanlar söz alıp, qabaatını inkâr etti ve körüşüvlerde «ekstremist mevzularda laf etmegenini» bildirdi.
«Qırım birdemligi» cemaat birleşmesiniñ bildirgenine köre, bunı mahkemede Arsen Kubedinov ve Talât Abdurahmanov ayttı.
Oturışuvda dava malümatı baqıldı. Prokuror delillerge, hususan Rusiyede yasaqlanğan diniy edebiyatqa diqqat ayırdı, dep aytıla haberde.
Kelecek mahkeme oturışuvınıñ keçirilmesi yanvarniñ 14-ne belgilendi.
Qırımdaki Rusiye FSB idaresi 2017 senesi oktâbrniñ 2-nde «Tebliğ Cemaatı» teşkilâtınıñ üç bölügi yoq etildi, dep bildirdi.
Kreml kontrolindeki Aqmescitniñ Kiyev rayon mahkemesi oktâbrniñ 3-nde qırımlı Renat Suleymanov, Arsen Kubedinov ve Talât Abdurahmanovnı «Tebliğ Cemaatı» areketinde iştirak etkeninde şeklep apiske aldı.
Qırım yarımadası Rusiye tarafından ilhaq etilgen soñ, yarımadada FSB tarafından muntazam surette jurnalist, faal, cemaatçılar tintile ve sorğuğa çekile.
Aq qorçalayıcılar bunı farqlı tüşüncenlerge saip olğanlarğa qarşı küreş dep tanıy.
«Tebliğ Cemaatı» – siyasetten çette turğan diniy arekettir. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – islâmda keniş eali arasında maneviy deñişmeler yapmaq ve içtimaiy ya da iqtisadiy vaziyetine baqmadan, bütün musulmanlarğa hitap etmekten ibaret. 2009 senesi Rusiye Yuqarı mahkemesi bu teşkilâtnı ekstremistik dep tanıyaraq, faaliyetini yasaqlağan edi.
