İşğal etilgen Qırımnıñ paytahtında Rusiye uquq qoruyıcıları Qırım Cumhuriyeti ve Aqyar şeeri musulmanları diniy idaresi (QCAQM) tarafından idare etilmegen Tavriya müftiliginiñ daa bir diniy mektebini qapattılar, dep haber ete Qırım.Aqiqat mühbiri.
Rusiye tarafdarı faal ve bloger Aleksandr Talipov mektepniñ mustaqil evde yerleşkenini ve «çet memleketlerniñ mefkürecilerinen bağlı musulman firqasına» ait olğanını, mektepte, iddia etilgenine köre, «nizam vesiqaları ve resmiy oquv derslikler yoq edi», dep ayttı. Mektep binasını mahkeme vekilleri müürlediler.
«Tavriya müftiliginen bağlı uquqiy qanunsızlıq bar. Mekteplerni qapatalar, Kezlevdeki Cuma Camini almağa tırışalar. «Tavriya müftiliginiñ» musulmanları Rusiye prezidenti Putinge ve Rusiyeniñ Qırım yolbaşçısı Aksenovğa «Tavriya müftiligi» qurulışlarını taqip etmekni toqtatmaq ricasınen muracaat etti. Olarnıñ fikirince köre, bütün bularnıñ artında QCAQM müftisi Emirali Ablayevniñ öz tesirini arttırmaq ve Qırımnıñ bütün musulmanlarını kontrol etmek istegi tura», – dep izaatladı Qırımdaki vaziyetni qırımlı aq qorçalayıcılardan biri adı gizli qalacaq şartınen.
QCAQM «Tavriya müftiligine» qarşı basqınen alâqası olğanını inkâr ete.
«Soñki künleri içtimaiy ağlarda özlerini «Tavriya müftiliginiñ» vekilleri dep adlandırğan bazı vatandaşlarnıñ, Habaşit tariqatınıñ tarafdarlarınıñ video muracaatı tarqaldı. Qırım Cumhuriyeti ve Aqyar şeeri musulmanları diniy idaresi bütün mesülietnen video muracaatıda iştirak etken vatandaşlarğa, em de olarnıñ tariqat faaliyeti ve problemlerine iç bir alâqası olmağanını bildire. Qırım müftiligine qarşı çıqarılğan bütün qabaatlavlar provokatsiya ve yalandır», – dep qayd etti QCAQM ve «Tavriya müftiligini» habaşizmde ve Ukrayina musulmanları diniy idaresinen bağları olğanında qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
